Himno Nacionale’ k’a’am juumnaj tu kúuchil Centro Acuático Metropolitano de Guadalajara. Juan Celaya yéetel Osmar Olvera tu k’ubajo’ob ti’ u noj lu’umil México u yáax medallail oro úuchik u beeta’al u keetil Copa del Mundo de Clavados, ts’o’okspaj jo’oljeak.
Le ka’atúul xi’ipalalo’oba’, ts’o’okili’ u yáax náajaltiko’ob plata tu keetil Juegos Olímpicos de París, le 2024 máanika’, ts’o’oke’ ti’ le beetchaj te’el k’iino’oba’, máano’ob táanil tu keetil sincronizados trampolín ka tu p’atajo’ob paachil u ka’atúul xi’ipalalil China yéetel Gran Bretaña.
En español: Juan Celaya y Osmar Olvera ganan primera medalla de oro en Copa del Mundo de Clavados
Tu ts’ook k’iinil keetile’, Celaya yéetel Olverae’ tu béeyili’ jp’áato’ob tu yáax kúuchilo’ob tsolk’aaba’ desde yáax clavado tu beetajo’ob, ts’o’oke’ mix juntéen j-éemo’obi’ Tu jo’oloj u ts’ook u téen úuchik u pulkubáajo’obe’, jach táaj ki’imak óolta’abo’ob ts’o’oke’ káaj u yawta’al ¡México, México!.
Jmexicoilo’obe’ tu béeykunsajo’ob 430.23, j-asiáticoilo’obe’ 413.16 yéetel británicoilo’obe’ 396.06.
Le medalla tu béeykunsajo’obe’, u kamp’éelil ti’al México, tu jo’oloj yanak óoxp’éel platas ti’ le keetilo’. Yéetel le k’a’anan meyaj tu beetajo’obo’, chan jp’ata’ab paachil chinoilo’ob máaxo’ob jach táanil yano’ob ka’achij.
Xak'alutskíinsa'an tumen: Sasil Sánchez Chan
