Chan Marshall aka Cat Powere’ jóok’ ichil u atrioil Ex Convento San Antonio de Padua tu noj kaajil Izamal. U takmaj jump’éel xk’éewel nook’ ka’aj wa’alaj k’aay tu táan kex 400 máako’ob múuch’ te’elo’, máaxo’ob tu yu’ubajo’ob óoli’ maanal jump’éel hora le jejeláas k’aayo’ob u beetmaj ti’ u meyaj.
U xk’aayil folk, blues yéetel rocke’ k’ajóolta’an tumen u k’aaye’ ku jach bek’echtal yéetel ku jach kóochtal, ts’o’oke’ tumen ba’ax ku ya’alik tu k’aaye’, ku na’ata’al tumen máaxo’ob u’uyik.
Káaj u k’aay tu kaajil Izamale’ kex 15 minutos mi’ili’ u chuk las 9 áak’ab. Chéen láak’inta’ab tumen batería, guitarra yéetel teclado. Lalaj súutuk ichil u k’aaye’, Chane’ t’aanaj yéetel máaxo’ob jbin u cha’antej ka’aj tu ya’alaje’ u yaabiltmaj Yucatán.
En español: A la luz de la luna, Cat Power conmueve al público en Izamal con un recorrido por su carrera musical
Marshalle’ tu k’áataj tak u k’aaba’ le “xk’an loolo’”, ka’aj núuka’ab ti’e’: “Cempasúchil”. Che’ejtab ti’ úuchik u ts’áakubáaj u ya’alej ba’ale’ ma’ jtsa’ayi’
Jujump’íitil úuchik u yuk’ik jump’éel té, ka’alikil xan tu k’ayaj Bad Religion, Wanderer yéetel de a capellae’ Can’t Give You Anything but Love, Baby, beeta’an tumen Billie Holiday, yéetel le tu ts’o’oksaj le súutuko’.
Cha’ane’ jbeeta’ab tumen u mola’ayil Secretaría de Cultura y las Artes de Yucatán, ikil u bin u kaxta’al u je’ebel uláak’ joolnajo’ob ti’al yucatanilo’ob ku meyajtiko’ob arte xan.
Xak'alutskíinsa'an tumen: Sasil Sánchez Chan
