Maanal 100 paalal ti’ u jejeláasil méek’tankaajilo’ob Yucatáne’ jmúuch’o’ob tu kúuchil Gran Museo del Mundo Maya ti’al u táakpajalo’ob 4.º Encuentro Infantil Multidisciplinario en Lengua Maya, beeta’ab tumen u mola’ayil Secretaría de la Cultura y las Artes (Sedeculta), ikil táan u beeta’al u nu’ukbesajil Alas y Raíces ti’ Secretaría de Cultura del Gobierno de México.
Tu súutukil meyaje’, paalale’ táakpaj ti’ u talleresil k’aay tuukul, paax, rap, tradicional báaxalo’ob yéetel balts’am ba’ale’ tuláakal ich maaya t’aan. Lelo’ ti’al u kaxta’al u mu’uk’ankúunsa’al u yóol maaya wíinik yéetel u nojba’alkúunsal moots.
Le ba’ax meyajta’aba’ táaka’an ichil u tuukul meyaj Renacimiento Maya, ku táakmuk’ta’al tumen u jala’achil u noj Lu’umil Yucatán, ti’al u kaláanta’al yéetel u ka’ kuxkíinsa’al maaya t’aan ich paalal.
Te’el súutuko’ táakpaj jk’aayo’ob je’el bix Pat Boy, DJ Rakalkú, Lupita Chan, jtiktoker Santos Tuz, xts’íib Daniela Cano Chan yéetel promotor cultural Fernando Santandreu, máax ku meyaj ludoteca Casa Zarigüeya, paalale’ tu kanaj bix u patjo’oltal jejeláas ba’alo’ob ich maaya t’aan ich its’atil, tecnología yéetel báaxal.
Te’el meyaja’ táakpaj paalal ti’ u kaajilo’ob Hoctún, Abalá, Maní, Teabo, Oxkutzcab, Kanasín, Ixil, Mayapán, Cansahcab, Dzoncauich yéetel Jo’. Ka’aj chúunsa’ab meyaje’, máax jo’olbesik Sedecultae’, Patricia Martín Briceño, yéetel máax jo’olbesik Museos y Patrimonio, Fidencio Briceño Chel, tu chíikbeso’ob u k’a’ananil maaya t’aan tumen leti’e’ ba’ax p’ata’ab to’on, le beetik unaj u k’ajóolta’al yéetel u t’a’anal.
“Tu meyajil Renacimiento Mayae’, unaj k-kaxtik bix u xíitil le t’aano’, ba’ale’ ma’ chéen ichilo’oni’, beyxan yiknal paalal, ti’al knoj ba’alchajal yóok’olal máaxo’oni’”, tu ya’alaj Briceño Chel. Ichil meyajo’ob beeta’abe’, talleres je’ex U t’aan puksi’ik’al: Palabras del corazón, meyajta’ab tumen Daniela Cano; beyxan A t’aaane’ Kuxaa’an, t’i’it’besej: Tu lengua vive, compártela, beeta’ab tumen Santos Tuz, tu’ux xak’alta’ab ik’il t’aan beyxan digital nu’ukulo’ob je’el u meyaj ti’al u mu’uk’ankúunsa’al maaya t’aan.
En español: Realizan 4.º Encuentro Infantil Multidisciplinario en Lengua Maya
Casa Zarigüeyae’ tu beetaj báaxalo’ob, xook yéetel paax, beyxan juegos de mesa; beyxan beeta’ab u talleril Vamos a crear rap ich maaya, tu’ux e’esa’ab bix je’el u mu’uk’ankúunsa’al yéetel u tsikbalta’al u kuxtal kaajo’ob ba’ale’ ich maaya.
Beyxan, paalal yéetel máaxo’ob láak’into’obe’ tu xíimbalto’ob u kúuchilo’ob Museo, tak u ye’esajil Kili’ich chuuyob: bordados mayas de uso ritual, tu’ux ku chíikbesa’al bix nuupul chuuy yéetel kili’ich tuukul. Tu ts’ooke’ táakpaj u múuch’il balts’am Titeradas yéetel u meyajil Lo que contaba chichí, ich maayakáastelan t’aan, tu’ux tsikbalta’ab u k’a’ananil láak’tsil ti’al u kanik wíinik u kuxtal kaaj yéetel miatsil.
Xak'alutskíinsa'an tumen: Sasil Sánchez Chan
