Táan u bin u xíimbal Yucatán ti’al ka béeyak u yantal U Consejoil Peninsular ti’al maayat’aan

Máaxo’ob ku meyajo’ob ti’ mola’ayo’ob ti’al u ts’aatáanta’al máaxo’ob ku t’aniko’ob maaya ichil u yóox jaatsil meyaj jala’ach tu Petenil Yucatáne’, yaan u táakpajalo’ob tu yáax meyajil ku k’aaba’tik U Nu’ukbesajil u ts’íibta’al maayat’aan, tu’ux yaan u kaxta’al u p’éelililkúunsa’al bix u ts’íibta’al yéetel u k’a’abéetkunsa’al maaya yéetel u yáantajil nu’ukbesajo’ob yéetel políticas jets’a’an u ti’al te’el lu’uma’.

Kaambesaje’ táan u beeta’al tumen Dirección de Museos y Patrimonio ti’ u mola’ayil Secretaría de la Cultura y las Artes (Sedeculta). Lela’ u yáax xáak’abil ti’al ka yanak Consejo Peninsular para la Maayat’aan, ikil táan u yantal múul meyaj ichil u jala’achil Yucatán, Kaampech yéetel Quintana Roo, tu’ux ku kaxta’al u k’i’itbesa’al, u mu’uk’ankúunsa’al yéetel u ka’ chíimpolta’al t’aan te’el petenila’.

Yéetel meyaje’, jala’ache’ ku ts’áak u muuk’ ti’ ba’ax ku beetik ti’al u chíimpolta’an maaya wíiniko’ob yano’ob te’el lu’uma’, tu’ux ka béeytak u k’a’abéetkunsiko’ob u t’aano’ob je’el tu’uxake’.

Yáax kaambale’ yaan u tse’ekta’al tumen máax jo’olbesik Patrimonio ichil u mola’ayil Sedeculta, Fidencio Briceño Chel; leti’ xan máax jo’olbesik múul meyaj ichil óoxp’éel noj lu’umo’ob ti’al ka béeyak u yantal Consejo Peninsular.

Yéetel meyaje’ máako’ob ku t’aniko’ob maaya yéetel ku meyaj ti’ jejeláas u mola’ayilo’ob jala’ach te’el petenila’, yaan y beetiko’ob ts’íibo’ob yéetel ba’alo’ob ichil le t’aana’ ti’al u mu’uk’anchajal xook yéetel ts’íib.

Ti’al u káajbale’ yaan u táakpajal ich Consejo Peninsular ti’al Maayat’aan máaxo’ob chíikbesik u jala’achilo’ob Yucatán, Kaanpech yéetel Quintana Roo, ba’ale’ u tuukulile’ ka béeyak xan u yokol uláak’ múuch’kabilo’ob yéetel kaaj.

Xak'alutskíinsa'an tumen: Sasil Sánchez Chan