K'iintsil
Efe
03/09/2025 | Madrid, España
U tojol u bo’ota’al oroe’, jump’éel ba’ax ku tukulta’al je’el u yáantaj wa ku p’áatal máak mina’an taak’in ti’e’, k’uch tu túumben jach ko’ojil le martes máanika’, tumen yóok’olal jump’éel onzae’ ku bo’ota’al 3.526 dólares.
Ichil ba’axo’ob jts’a’ab k’ajóoltbil tumen Bloomberge’, tu súutukil 16.15 horas GMT u tojol oroe’ tu chukaj 3.526,42 dólares yóok’olal jump’éel onza, túumben record, ka’alikil táan ka’ach u xíimbal yóok’ol u 1.4 %.
Oroe’ k’uch tu jach ko’ojil tu sáasbal le martes máanika’, tumen k’uch ka’ach 3.508,73 dólares, ba’ale’ ts’úum u tojol tu sesión bursátilil ts’o’oke’ tu béeyili’ p’aatal u cotización.
Ka tu chukaj las 13.00 GMT tu ka’ ch’a’aj bej u ka’ na’akal, le beetike’ mantats’ úuchik u bin u máansik u maas ko’ojil.
Récord yaan ka’ache’, 3.500.10 dólares yóok’olal jump’éel onza, ts’o’oke’ lelo’ úuch tu k’iinil 22 it’ abril pasado 22 de abril.
Je’el bix oroe’, u tojol platae’ láayli’ xan k’ucha’an tu jach ko’ojil. Táan u bo’ota’al 40.83 dólares yóok’olal jump’éel onza
Ajxaak’al máako’obe’ ku tsoliko’ob u tojol le jats’ust metalo’obo’ táan u ko’ojtal tumen táan xan u nojochtal tuukul a’alike’ yaan u yéensa’al u tiposil interés tumen Reserva Federal estadounidense (Fed), ikil yaan u much’ikubáaj le 16 yéetel ti’ septiembre ku taala’.
Beey túuno’, u responsableil mercado Capitales de Natixis, Jesús Saez tu ya’alaj «chi’ichnakile’ mantats’ uts u nupikubáaj ti’al u beeta’al u yutsil áalkab u ko’ojil u ch’a’abal oro».
Xak'alutskíinsa'an tumen: Sasil Sánchez Chan
