María Luisa Castro, chíimpolta’ab yéetel XVIII Premio Internacional de Poesía del Mundo Maya

U méek’tankaajil Calkiní, ikil múul meyajnaj yéetel Instituto de Cultura y Artes ti’ u noj lu’umil Kaanpeche’, tu k’ubaj XVIII Premio Internacional de poesía del Mundo Maya “Waldemar Noh Tzec 2025”, tu’ux ku chíimpolta’al k’a’anan t’aano’ob péektsiltik yéetel kaláantik u noj ba’alil miatsil te’el lu’umo’.

Tu súutukil úuchik u k’u’ubul chíimpolale’, táakpaj u máakilo’ob u yóox jaatsil meyaj jala’ach: máax jo’olbesik Instituto de Cultura y Artes del Estado de Campeche, Mónica Alejandra Sosa Rodríguez; jka’ansaj Gaspar Ariel Herrera Farfán, máax jo’olbesik Gobernación, ti’al u chíikbesa’al u jala’achil kaaj, Milton Ulises Millán Atoche.

Te’el ja’aba’, náajalta’ab chíimpolal tumen María Luisa Castro González, juntúul xcontadora jubilada, tanatóloga yéetel xts’íib síij tu kaajil Ticul, Yucatán. Meyaj chíimpolta’abe’ ku k’aaba’tik Ooken xíimbal tin wotoch, tu’ux ku noj ba’alkúunsa’al k’a’ajesajil, óol yéetel miatsil.

Chíimpolale’ jk’u’ub le 29 ti’ agosto máaniko’, tu kúuchil Teatro de la Ciudad “Pedro Raúl Cárdenas Suárez”, ts’o’oke’ beeta’ab xan u cha’anil tu’ux táakpaj Charanga Infantil-Juvenil “Balché” yéetel Grupo Jaranero de la Casa de Cultura de Dzitbalché.

Le ja’ab máaniko’, chíimpolta’ab Sasil Sánchez, máax xan ku beetik u editorail K’iintsil méek’a’an tumen La Jornada Maya. Beey túuno’, te’el ja’aba’, u yóoxp’éelil u náajalta’an tumen yucatánilo’ob, ba’ale’ te’el ketlamila’ ku béeytal u táakpajal máaxo’ob yaan Kaanpech, Quintana Roo yéetel Yucatán, ba’ale’ beyxan wíinik yaan Guatemala, Honduras yéetel El Salvador.