U kúuchil Gran Museo del Mundo Maya (GMMM) jo’olbesa’an tumen Secretaría de la Cultura y las Artes (Sedeculta) táan u mu’uk’ankúunsik meyaj ku beetik ti’al chíimpolta’al u yóol u kaajil Yucatán, tu’ux xan ku nojba’alkúunsa’al ba’ax suuk u beeta’al tumen kaaj, u k’ajla’ayil yéetel u chíikul le k’iino’oba’.
Yéetel meyaj ku beeta’ale’, ts’o’ok u táakpaja’al maanal 12 mil máak ti’ kaambal, múuch’, cha’an, ichil uláak’ ba’alo’ob. U meyajil Renacimiento Mayae’ ku béeytal tumen táan xan u péek u kúuchil Dirección de Patrimonio y Museos, jo’olbesa’an tumen jmaaya’ob Fidencio Briceño Chel, Elisa Chavarrea Chim, beyxan Julián Dzul Nah.
En español: Yucatán: Gran Museo del Mundo Maya recibe a más de mil visitantes en su labor de promoción cultural
Ti’al u winalil octubre ku taala’ u kúuchil Gran Museo del Mundo Maya yaan u k’amik OriginalEncuentro de Arte Textil Mexicano, táan u beeta’al tumen Secretaría de Cultura del Gobierno de México yéetel Gobierno de Yucatán, ikil u k’ubéentmaj meyaj ti’ Sedeculta, tu’ux yaan u kóojol kex 300 u túul máaxo’ob meyajtik artesanías ichil tuláakal u noj lu’umil México.
Ichil ba’axo’ob táan u meyajta’al Museoe’, ti’ yaan u kaambalil xook yéetel ts’íib ich maaya, beyxan seminario ti’al comunicadores yéetel mola’ayo’ob.
Ku beeta’al xan jejeláas e’esajilo’ob yaan ba’al u yil yéetel maaya kaaj, beyxan yéetel ba’axo’ob u yojel kaaj, tsikbalo’ob, e’esajil, yéetel uláak’ ba’axo’ob ku múul meyajta’al tumen uláak’ u mola’ayilo’ob jala’ach yéetel múuch’o’ob meyaj.
Byexan, uláak’ ba’ax meyajta’ab te’el kúuchilo’, leti’ u k’iimbesajil Día Internacional de la Lengua Materna yéetel Día de los Pueblos Indígenas, tu’ux kóoj maanal 3 mil 500 máako’ob; je’el bix xan Feria Internacional de la Lectura Yucatán, tu’ux yanchaj maanal 80 u p’éel jejeláas meyajo’ob xma’ bo’olil, tu’ux k’uch maanal 5 mil máako’obi’.
Yaan xan cha’ano’ob beeta’an tu kúuchil Sala Mayamax –tu’ux túumbenkunsa’al u nu’ukul e’esajil yéetel juum- tu’ux beeta’ab Gira de Documentales Ambulante, beyxan Ciclo Rumbo al Ariel, ichil uláak’ e’esajilo’ob.
Xak'alutskíinsa'an tumen: Sasil Sánchez Chan
