PetStar, u kúuchil u réesiklaarta’al PET ku meyaj ti’al janabe’enba’alo’ob -grado alimenticio- maas jach nojoch yaan tu noj lu’umil México yéetel yóok’ol kaab, ts’a’aban tu noj kaajil Tolucae’, tu káajsaj u meyaj Fase 3, te’el k’iino’oba’. Yéetel le túumben kúuchil je’ek’abta’aba’ yaan u ya’abtal 70 por siientoil le beyka’aj próoduxion ku béeytal u resiklarta’al resiináa, ts’o’oke’ yaan u mu’uk’ankúunsa’al xan u kúuchil tu’ux ku k’a’amal wa u beeta’al akopyóo.
Ikil táan u nojochkíinsa’al meyaje’, ti’ le 50 mil tóoneladáas suuk u meyajta’al ti’al réesiklaarta’al resinae’, yaan u náaka’al tak 86 mil tóoneladáasil PET ichil jump’éel ja’ab. Lela’ u k’áat u ya’alej kex 5 mil 500 miyoonesil boteyaasil yaan u béeytal u ka’ oksa’al ichil u káadenail báalor éemboteyadorilo’ob.
La Jornada Mayae’ béeychaj u bin te’el k’iin ka’aj je’eb kúuchil, úuchik u t’a’anal tumen Bepensa, jump’éel u áaxionistail mola’ay PetStar, tu’ux táaka’an xan Arca Continental, Coca-Cola México, Corporación del Fuerte, Grupo RICA, Grupo Embotellador Nayar yéetel Embotelladora de Colima.
En español: Inauguran expansión de PetStar, planta de reciclaje de PET grado alimenticio más grande del mundo
Tu súutukil je’eb kúuchile’, táakpaj Alicia Bárcena, máax jo’olbesik Medio Ambiente y Recursos Naturales, máax tu ya’alaj PetStare’, jump’éel mola’ay Méxicoil u ch’i’ibal,ts’o’oke’ k’a’anan ti’al u mu’uch’ul nu’ukulo’ob ku réesiklaarta’al ba’ale’ le de graadóo áalimentisyóo.
Beyxan tu ya’alaje’ “u kúuchil PetStare’ jump’éel sáasil e’esajil ti’ bix je’el u páajtal u ch’éenel u k’a’abéetkunsa’al túumben plaastikóo te’el k’iino’oba’, tumen u jeel meyaj ti’ máak le yano’obe’ je’el u béeytal u beeta’al ya’abach juntéenake’”.
Bárcenae’ tu ya’alaj xan sáansamal tu noj lu’umil Méxicoe’ ku jóok’ol 120 mil u tóoneladasil báasuráa, le beetike’ tu ts’áaj u níib óolalil ti’ ALejandra Malagón Barragán, máax jo’olbesik Confederación de Cámaras Industriales (Concamin) úuchik u táakmuk’tik Ley General de Economía Circular; tumen walkila’ ts’o’ok u yoksa’al tsikbaltbil Cámara de Diputados, ti’al u sáasilkunsa’al bix u k’a’abéetkunsa’al wa u péektsilta’al túumben nu’ukukulo’ob ti’al u láak’inta’al mola’ayo’ob ti’al ka béeyak u k’uchul u k’a’abéetkunso’ob xan tu beel yéetel tu jach no’ojanil.
Xak'alutskíinsa'an tumen: Sasil Sánchez Chan
