K'iintsil
Ap
09/02/2026 | Milán, Italia
Jach k’aas úuchik u lúubul Lindsey Vonn ti’ u keetil ko’olel táan ka’ach u beeta’al ich Juegos Olímpicos ti’ u kaajil Milán-Cortina, ts’o’oke’ lelo’ tu k’as jelbes bix úuchik u ki’iki’ óolta’al náajal tu béeykunsaj u yéet lu’umil Breezy Johnson, úuchik u k’amik u yáax medaayail oro ti’al Estados Unidos te’el keetilo’.
Ba’ax tu béeykunsaj Johnson le domingo máanika’, tu kaajil Cortinae’, ma’ j-úuch je’el bix tukulta’an ka’achil kun suut ti’ oliimpikóo keetilo’obi’.
U yich máake’ ti’ jeets’el yóok’ol Vonne’, máax táan ka’ach u kaxtik oro, kex tumen yajili’ u xts’íik piixe’. Ts’o’oke’, kex ta’aytak u béeykunsa’al yáax oro tumen Johnsone’, péeknaj u yóol úuchik u yilik jlúub Vonn. U ts’ooka’, káach u yook yéetel yanchaj u biinsa’al tu najil ts’akyaj, tu’ux óoperarta’abij.
Beyxan, Estados Unidose’, chíikbesa’an tumen Ilia Malinin, úuchik u béeykunsijk tuka’atéen ooro ichil u keetil páatinajee artiistikóo ich múuch’o’ob, úuchik u máan táanil ti’ Japón. Viernes úuch u k’iimbesajil ti’al u chúunul keetilo’ob. Kamp’éel tu’ux úuchij yéetel yanchaj ka’ap’éel péebeteero’ob.
Franjo von Allmen, juntúul jsuizoil esquiadore’, béeychaj u ts’o’oksik keet le sábado máanika’, ka tu k’amaj yáax ooro ti’ le keetilo’.
Ti’al u ts’o’okbal le domingo máanika’, u noj lu’umil Noruegae’ ti’ yaan tu yáax kúuchil ichil lu’umo’ob náajaltmail medaayáas tumen ts’o’ok u béeykunsik óoxp’éel ooro, yéetel tu paache’ ti’ yaan Estados Unidos, ts’o’ok ka’ap’éel ti’.
