Jpapa León XIV tu k’áataj le lunes máanika’, ka sa’atbesa’ak si’ipil yóok’lal ba’ax beeta’ab tumen Santa Sede ti’al u tóoch’ta’al esclavitud, yéetel tumen tu k’iinilo’ob táan jach u paalitsilta’al máake’, ma’ jbeeta’ab mixba’al ti’al u ch’éejsa’ali’. Beyxan tu ya’alaje’ u historialil Vaticanoe’ “yaj ba’al ich cristianail k’a’ajesajil”.
U jeel papaob ts’o’ok u máano’obe’ ts’o’ok xan u k’áatiko’ob ka sa’atbesa’ak si’ipil tumen yaan cristiano’ob konik esclavos, ba’ale’ mix juntúul papa u chíimpoltmaj tu táan kaaj le je’elo’, mix xan u k’áatmo’ob ka sa’atbesa’ak si’ipil yóok’olal ba’ax xan tu beetaj uláak’ papaob ts’o’ok u máan úuchik u ts’áak tu k’ab europail máak u muuk’ ti’al u paalitsilta’al “infiel” wíiniko’ob.
Ichil u historia familiaril yáax papa síij tu lu’umil Estados Unidos ichil tuláakal historia ts’o’ok u yáalkabe’, ku chíikbesik táaka’an palitsil máak yéetel uláak’o’ob ti’alint esclavos, le beetik tu ts’áaj k’ajóoltbil ju’un tu’ux ku k’áatik ka sa’stbesa’ak u si’ipil, tu ts’íibil “Magnifica Humanitas” (Humanidad Magnífica), jts’a’ab k’ajóoltbil le lunes máanika’.
En español: León XIV ofrece una disculpa histórica por el papel de la Iglesia Católica en legitimar la esclavitud
Ts’íibe’ ku kaxtik u tokik wíinik ti’ le k’iino’oba’ tu’ux táan u ch’a’ak u muuk’ inteligencia artificial. León tu ya’alaje’ trasatlántico koonol esclavose’ tu ketaj yéetel u túumben formail u palitsilta’al máak te’el k’iino’oba’, tumen táan u yúuchul yéetel digital ba’alo’ob beetik ma’ u chíimpolta’al u meyaj wíinik ti’al u jóok’sa’al jela’antak mineralo’ob ku k’a’abéetchajal ti’al u beeta’al u chipilo’ob IA.
Anthea Butler, x xak’al xook Koch History Center, tu noj najil xook Universidad de Oxford, tu ya’alaj k’a’abéet ka’ach u chíimpoltik León le ba’ax tu beetaj iglesia católica ti’al u táakmuk’tik u palitsilta’al máak, tumen chéen ja’alil beey “je’el u béeytal u t’aan tu jaajil yóok’olal talamilo’ob yaan walkila’, ikil táan u palitsilta’al wíinik tumen le tecnologíao’”.
Xak'alutskíinsa'an tumen: Sasil Sánchez Chan
