Nahua ko’olel ti’ u kaajil Naupan, Puebla meyajnaj ti’al u chu’uyul colección especial “Artisan JSY” ti’alinta’an tumen Adidas yéetel Someone Somewhere nook kun búukintbil tumen Selección Mexicana, ich Mundial 2026. Ba’ale’, walkila’ táan u yantal xwo’okin tu paach; kex beyo’ ma’ a’alak mix ba’al tumen u jala’achilo’ob México ti’al u jach xak’alta’al tu beel bix úuchik u beeta’al le meyajo’, beyxan ba’axo’ob ti’ miatsil táakbesa’an yéetel bix úuchik u bo’olil.
Le ba’ax úucho’, káaj u chíikpajal ich redes sociales beyxan ti’ medios nacionales, tu jo’oloj a’alak táakbesa’ab u artesanailo’ob Sierra Norte ti’ u lu’umil Puebla ti’al u chu’uyul chíikulalo’ob, je’el bix escudo nacional beyxan u logotipoil Adidas ti’ le nook’o’ob kun k’a’abéetkunsbil ti’al le báaxalo’. Beey túuno’, coleccióne’ jts’a’ab k’ajóoltbile’ ti’al xan u chíimpolta’al meyajo’ob ku beeta’al tu lu’umil México yéetel ba’axo’ob ku chu’uyul te’el máasewal kaajo’obo’, chéen ba’axe’ tak poolo’ob beeta’ab tumen kaaje’, tu chíikbeso’ob k’as náach p’áatik ba’al ichil ba’ax ku ya’alal ti’al u chíimpolta’al miatsil yéetel le bajux ku bo’ota’al ti’ ko’olelo’ob ku chúuy.
En español: Adidas enfrenta críticas por pago a artesanas de Puebla que bordaron camisetas de colección del Mundial
Ichil ba’axo’ob a’alab tumen Tatiana Bernáldez, juntúul máax jach kaambanaja’an yo’olal u simbologíail nook’o’obe’, xchuuyo’obe’ chéen tu k’amo’ob 36 pesos yo’olal jump’éel k’iinil meyaj, le je’elo’ kex 8 horas, ba’ale’ nook’ tu ts’ooke’ ku ko’onol kex 4 mil pesos u tojol. T’aan táan u yantal túun tu paache’. ma’ chéen yóok’olal u bo’olil, beyxan yóok’olal u yoochel Naupan ti’al u táakmuk’ta’al jump’éel nook’ kun péeksbil tumen Adidas, Selección Mexicana yéetel Mundial 2026 tu táan yóok’ol kaab.
Tak poole’ ku kaxtik u ye’esik bix u chíimpolta’al chuuy. Meyaj bin k’ubéenta’ab ti’ nahua ko’olele’ ma’ jbeeta’ab jach je’el bix u chu’uyul tu kaajil Naupan, tumen k’a’abéetkunsa’ab tak hilos industriales, le beetik a’alabe’ chéen u xéexet’aj miatsil ku ch’a’abal ti’ le kaajo’. Beyxan a’alab bine’, yaan ts’a’abal seguro médico ti’al u familiar le xchuuyo’obo’, ba’ale’ ma’ bin béeychaji’.
Ba’ale’, kex tumen desde 2022 je’ets’ Ley Federal de Protección del Patrimonio Cultural de los Pueblos y Comunidades Indígenas y Afromexicanas ich Diario Oficial de la Federación tu k’iinil 17 ti’ enero, tak walkila’ ma’ a’alak mix ba’al tumen jala’acho’ob wa mola’ayo’ob.
Xak'alutskíinsa'an tumen: Sasil Sánchez Chan
