Le 26 ti’ septiembre máanika’, jnáak wakp’éel ja’abo’ob sa’atbesa’ak u 43 xoknáalilo’ob Ayotzinapa, le beetike’ máax beetik u fiscal generalil ti’ u lu’umil México, Alejandro Gertz Manero tse’eknaj ti’ Internet. Te’elo’ tu tsikbaltaj ba’axo’ob meyajil ts’o’ok u seen beeta’al tumen mola’ay ku jo’olbesik ti’al u sáasilkunsa’al ba’ax úuch te’e k’inako’. Le beetike’ tu jach tsikbaltaj ba’axo’ob seten a’alab j-úuch tumen u ajmeyajilo’ob jala’ach yaan ka‘achij, ti’al ma’ u yojéelta’al jach tu jaajil ba’ax úuch tu yáak’abil u ja’abil 2014, tu noj kaajil Iguala, Guerrero, tu’ux tu ya’alaj xane’, u nojochil máaxo’ob ku meyajo’ob ti’ jala’ach ka’achile’ ma’ patal ba’ax tu beetajo’obi’ le beetik ma’ xan jts’a’ab u si’ipil máax beet k’aasil yóok’ol xoknáalo’ob.
También te puede interesar: Ayotzinapa, deuda de Estado
Gertz Manero tu jach a’alaj: jach táaj sáasil yanik jala’ach máanik, ti’ tuláakalo u mola’ayile’, tu ta’akajo’ob, tuusnajo’ob, tu jets’ajo’ob u muuk’ yéetel tu ya’alajo’ob ba’alob ma’ patalo’obi’ ti’al u ma’ u chíikpajal ba’ax úuchij, chéen ba’axe’ walkila’ ts’o’ok u káajal k-e’esik jach ba’ax úuchij yéetel u jaajil.
Beey túuno’, ka’alikil ti’ yaan Palacio Nacionale’, u jala’achil u noj lu’umil México, Andrés Manuel López Obradore’, tu ya’alaj jach yaj óol úuchik u sa’atbesa’al 43 u túul u xoknáalilo’ob u najil xook Escuela Normal Rural Raúl Isidro Burgos, ts’o’okole’ tu ya’alaj xane’, meyaj ku beeta’al lik’ul u mola’ayilo’ob jala’ache’ u ts’áamaj u yóol ti’al ma’ u ta’akal mixba’al, yéetel tu k’áaaj ka sa’atatbesa’ak u si’ipil México, tumen jach ma’ je’ets’ek u muuk’ a’almajt’aan ti’al u máaxo’ob beet le k’aasil ba’ala’, ts’o’okole’ le noj lu’uma’ k’a’abéet u yutskíintik ba’ax úuchij yéetel najmal u sáasilkunsik u jaajil.
.jpeg)
