U XVI Legislaturail ti’ u Congresoil Quintana Roo ma’ u ts’áamaj u yóol ti’al ka yanak tsikbal yéetel ti’al u yila’al bix je’el u páajtal u yúuchul meyaj, beey úuchik u ya’alik máaxo’ob táaka’an ichil Red Feminista Quintanarroense, ka’aj núup’ ka’ap’éel winalo’ob úuchik u to’okol u Congresoil Quintana Roo.
Ichil k’a’aytajil tsikbal beeta’abe’, a’alabe’, kex tumen díiputaado’obe’ tu jets’ajo’ob u k’iinil meyaj ti’al u xak’alta’al ba’axo’ob patjo’olmeyajil táan u tukulta’al ti’al u yéensa’al paale’, ma’ yanak mixjump’éel meyaj tu yóok’lal, yéetel ts’o’ok tak u jets’iko’ob jayp’éel k’iin tu’ux ku xo’ot’ol meyaj, kex tumen u kúuchil Congreso yéetel tak u jeel kúuchil yaanti’obe’ ti’ p’aatalo’ob te’e noojolo’, tumen te’elo’ láayli’ k’aank’an yanik semaforóo.
U díiputadoilo’ob XVI Legislaturae’ ma’ xan u táakbeso’ob uláak’ tuukulmeyajo’ob ichil le bolonp’éel ts’o’ok u yáax k’u’ubul te’e tsoolts’íibil k’u’ub ti’ u jala’achil le lu’umo’, Carlos Joaquín, yéetel unaj u xak’alta’al tumen Legislativo.
También te puede interesar: Diputados rompieron el diálogo: Red Feminista Quintanarroense
“Bejla’e’ ku chúukpajal ka’ap’éel winal to’okok u Congresoil Quintana Roo tumen múuch’kabilo’ob táaka’ano’ob ichil Red Feminista Quintanarroense, ts’o’okole’ kex to’one’ mantats’ je’el k-óotik tsikbale’, díiputado’obe’ ma’ u ts’áamaj u yóolo’ob ti’al ka úuchuk yéetel ti’al ka je’ets’ek meyaj unaj u beeta’al yóok’lal le lajunp’éel ba’alo’ob k’u’ub tumen múuch’kabil tu winalil noviembre ti’ u ja’abil 2020, tuláakal ba’ax k’áata’abe’ ti’al u yutsil xch’úupalal yéetel ko’olel ti’ u lu’umil Quintana Roo, ti’al ma’ u loobilta’alo’ob yéetel ti’al u chíimpolta’al u páajtalilo’ob”, tu ya’alajo’ob.
Beyxan núup’ 37 k’iino’ob úuchik xan u xo’ot’ol sáasil yéetel ja’ te’e kúuchilo’, kex tumen táan u tse’elel páajtalil unaj u yantal ti’ob ti’al u líik’sik u t’aano’ob.
“Ti’al 21 ti’ diciembre ka’aj xóot’ sáasil yéetel ja’ tu kúuchil Congreso, ts’o’okole’ le je’elo’ ku loobiltik k páajtalil ti’al k líik’sik t’aan, ts’o’okole’ ma’ xan táan u páajtal u kaláanta’al u toj óolal xch’úupalal yéetel ko’olel ku táakpajalo’ob xani’, kex tumen talam yanik ba’al yóok’lal u pak’be’en k’oja’anil COVID-19 ikil u bin u ya’abta’al máak ku k’oja’antal ichil tuláakal u noj lu’umil México”, tu tsikbaltajo’ob.
Beyxan tu ya’alajo’ob tuka’atéene’, máax jo’olbesik Junta de Gobierno y Coordinación Política, Gustavo Miranda García, chéen ku péektsiltik ti’ redes sosiiales p’eekil yéetel péech’óolal yóok’ol máaxo’ob ku ba’atel yóok’lal u páajtalilo’ob wíinik.
Xak'alutskíinsa'an tumen: Sasil Sánchez Chan
