Chéen ikil “u ya’alik” táan u báaxtiko’ob kóochak’ wóolise’, u múuch’kabil Chicas Unidas-Girls United FA México táan u kaxtik u péektsiltik u ts’áak u muuk’il u yóol yéetel u yantal kéet kuxtal ichil xiib yéetel ko’olel tu méek’tankaajilo’ob u noojlil Quintana Roo, ikil u ts’áak tu’ux u yantal xch’úupalal yéetel ko’olel.
Múuch’kabile’ ku meyaj tu kaajilo’ob Bacalar, José María Morelos yéetel Othón P. Blanco, ts’o’okole’ ts’o’ok kamp’éel ja’ab káajak u meyaj; yáaxe’ chéen beey kluub déeportibóo ku meyaj ti’al u ka’ansik ko’olel báaxal, ba’ale’ ku meyaj xan ti’al xan u ye’esik nu’ukbesjo’ob tu’ux ku péektsilta’al kéet kuxtal ichil xiib yéetel ko’olel te’e kaajo’obo’.
También te puede interesar: A través del futbol empoderan a niñas y jóvenes para que encuentren sus propias voces
Chicas Unidas-Girls United FA México ku meyaj ti’al u tóoch’tik ba’ax no’ojan ti’ xch’úupalal yéetel ko’olel, ti’al u náachkunsik u tuukulo’ob yéetel u báaxalil deportée, ba’ale’ beyxan ti’ uláak’ ba’alo’ob, ti’al beyo’ tu paachil k’iine’ u chíikpajal tu kaajalo’obi’.
Ti’ k’áatchi’ tsikbal tu beetaj Calatayud Martínez yéetel La Jornada Mayae’, tu tsikbaltaj u yutsil ku taasik tu kuxtal paalal u beetik uláak’ ba’alo’ob ma’ táaka’an ti’ ba’ax ku beetik tu xooko’obi’. “Ikil kkaxtik kbeetik u yantal no’ojan kúuchil ti’al xch’úupalalo’obe’, knáats’al ktsilbalt uláak’ ba’alo’ob talam u tsikbalta’al”; je’el bix sexualidad, k’ooja’an yéetel uláak’ ba’alo’ob k’a’anan u ti’alo’ob.
Múuch’kabile’ ku meyaj yéetel xch’úupalal yéetel xlo’obayen paalal ichil 5 tak 18 u ja’abil. Yéetel u nu’ukbesajil
Pioneras
e’, múuch’kabile’ táan u ka’ansik lajuntúul xch’úupalal, tu’ux lalaj juntúule’ u jets’maj ba’ax u k’áat u béeykunsej. Múuch’kabile’ áanta’an tumen pribaadóo mola’ayo’ob, beyxan ku mu’uch’ul taak’in ti’al u páajtal u meyaj, ba’ale’ leti’obe’ ku kaxtiko’ob xan wa bajux ti’al u páajtal u yáantajo’ob xma’ bo’olili’.
Xak'alutskíinsa'an tumen: Sasil Sánchez Chan
