de

del

Chéen 1.31% ti’ máaxo’ob tsa’ayti’ob COVID-19 u manmaj ka’ach áantaj ti’al u bo’otik u ts’a’akal

U jela’anil COVID-19 ichil chak ik’al yéetel u tíitkubáaj lu’ume’, ti’ yaan tumen le yáaxo’ jump’éel k’oja’anil
Foto: Reuters

Chéen 1.31 por ciento ti’ máaxo’ob ts’o’ok u tsa’ayal ti’ob COVID-19e’ tu lu’umil Méxicoe’ yaan ka’ach ti’ob jump’éel seguróo ti’al kéen k’oja’anchajako’obi’, ts’o’okole’ kex beyo’, pak’be’en k’oja’ane’ ti’ yaan tu jo’o kúuchil yóok’lal u jach k’aasil ba’alo’ob ko’oj u áasegurarta’al te’e noj lu’uma’, beey úuchik u ts’a’abal k’ajóoltbil tumen Asociación Mexicana de Instituciones de Seguros (AMIS).

 

También te puede interesar: Sólo 1.31 por ciento de los enfermos de COVID-19 tenía seguro médico

 

Máaxo’ob konik seeguro’obe’ ku much’iko’ob bo’olil ku yantal u beetiko’ob yóok’ol mil 55 millonesil dólares (mdd) ti’al u káajbal u winalil febrero yóok’lal COVID-19, le je’ela’ tumen ku yantal u bo’otal seguróos de biidáa wa u bo’olil u ts’a’akal máak. Le taak’ina’ ku píitmáansik bo’ol yanchaj u beeta’al úuchik u tíitikubáaj lu’um tu ja’abil 1985 (2 mil 220 mdd); ts’o’okole’ láayli’ máanja’an ti’ k’aasil ba’alo’ob úuch, je’el bix u chak ik’alil Wilma (2 mil 220 mdd); ka’aj tíitpaj lu’um tu k’iinil 19 ti’ septiembre (mil 257 mdd). 

U jela’anil COVID-19 ichil chak ik’al yéetel u tíitkubáaj lu’ume’, ti’ yaan tumen le je’elo’ jump’éel k’oja’anil, ts’o’okole’ ba’ax ku yantal u beeta’al tu yóok’lale’ ma’ táan u yúuchul tumen ku k’astal nu’ukulo’ob wa ba’ax ku yantal ti’ máak, beey úuchik u ya’alik Norma Alicia Rosas, máax jo’olbesik AMIS.

“Le k’aasil ba’alo’oba’ suuk ka’ach u yúuchul ichil máaxo’ob yano’ob tu súutukil kéen úuchuk”, ku páajtal u xo’okol jaytúul máak úuch loobi’ yéetel u je’ets’el beyka’aj k’aasil úuchij. Ba’ale’ yéetel COVID-19e’ jela’an bix u yúuchul, ma’ xan ojéela’an ba’ax k’iin kéen ts’o’okok yéetel “míin yaan u p’áatal beey u jach k’a’anan k’aasil yaan u yantal kts’aatáantik ichil máaxo’ob kkonik seguróos”, tu ya’alaj.  

Lalaj p’isk’iinile’, AMISe’ ku ts’áak k’ajóotlbil jaytúul máak tsa’ay ti’ COVID-19 ichil máaxo’ob ti’ kona’an seguróos. Tu ya’alaje’ tak tu yáax k’iinil febreroe’ unaj u bo’ota’al 10 mil 235.6 millonesil pesos.

Xak'alutskíinsa'an tumen: Sasil Sánchez Chan