Máasewal ko’olel, máaxo’ob t’anik maaya wa ma’e’, páayt’anta’ano’ob ti’al u táakpajalo’ob ti’ u meyajil “Mujeres por la defensa del territorio”, tu’ux yaan u yantal u páajtalil ti’ob u ka’ansalo’ob tumen jayp’éel u múuch’kabilo’ob México ti’al u kanik u xak’altukultiko’ob beyka’aj loobilaj ku yantal ken jo’op’ok u beeta’al nojmeyajo’ob tu lu’umil Yucatán.
“U tuukulile’ ka béeyak u yantal múul meyaj ti’al u kaláanta’al k’áax, ts’o’okole’ u mu’uk’anchajal ba’ax ku beetik kaaj ti’al u páajtal u yantal u t’aan ich tsoolil ba’ale’ beyxan mu’uk’an, tu lu’umil Yucatán”, beey úuchik u ya’alik Kelly Ramíerez Alpuche, máax jo’olbesik Igualdad Sustantiva Yucatán, jump’éel ti’ le múuch’kabilo’ob ku beetiko’ob páayt’aan.
También te puede interesar: Convocan a mujeres por la defensa del territorio de comunidades indígenas
Máasewal ko’olel u k’áat táakpajale’, ku páajtal u yokol tu reedes sosiaalesil Igualdad Sustantiva Yucatán, wa u yokolo’ob ti’ u t’o’olbejil https://docs.google.com/forms/d/e/1FAIpQLSeIdaEUwdjDjgrthEMZyMoCBVi5Lo9Mw4pG4EmEroP3ySXhKQ/viewform?usp=send_form, ti’al u yila’al ba’ax k’a’abéet ti’al u táakpajal ko’oleli’.
Máax u k’áate’ unaj yaan u ja’abil ichil 18 tak 29; unaj táan u xookik wa ts’o’ok u ts’o’oksiko’ob wa ba’ax káarerail, ba’ale’ u jach nojba’alile’ ka u ye’es u k’áat kaambal yóok’lal talamilo’ob ku máansik máasewalo’ob yéetel kaajo’ob, je’el bix xan tumen áafromexikaano’ob.
Tak tu k’iinil 13 ti’ febrero kéen béeyak u ts’íibitk u k’aaba’ ko’olel, ts’o’okole’ táan u kaxta’al ka táakpajak u ya’abil ko’olel ku taal tu mejen kaaj, kajtalilo’ob yéetel kaajo’ob yano’ob tu bak’pachil Saki’. Ts’o’okole’ táan u múul beeta’al tumen Cometa Estelar yéetel Cohesión Comunitaria e Innovación Social AC (CCIS).
Xak'alutskíinsa'an tumen: Sasil Sánchez Chan
