Le 8 ti’ febrero máanika’ k’a’ajsa’ab U K’iinil Ch’ich’il, wa éepilepsia, le beetike’ ichil múul meyaj mokt’anta’ab u beeta’al ichil Instituto Nacional de las Lenguas Indígenas (INALI), Capítulo Mexicano de la Liga contra la Epilepsia (CAMELICE) yéetel Armstrong Laboratorios de México, je’ets’ u ts’aatáanta’al u meyajil Luchando por la epilepsia sin barreras.
Meyaje’ jts’a’ab k’ajóoltbil u beeta’al le ja’ab máaniko’, yéetel ichil ba’ax ku beetike’, ku ts’áak k’ajóoltbil sutt’aano’ob yéetel uláak’ meyajo’ob yaan ba’al u yil yéetel u meyajil ts’akyaj yóok’lal le k’oja’ana’, ba’ale’ ichil jayp’éel u máasewal t’aano’ob u lu’umil Méxcio, je’el bix: náhuatl, maya, mixteco yéetel tzeltal; ku na’aksalo’ob ti’ jump’éel kúuchik Internet.
También te puede interesar: Llevarán información sobre epilepsia en lenguas indígenas a comunidades
Walkila’ táan u kaxta’al u ts’o’oksa’al yéetel u jach k’i’itbesa’al sutt’aan ts’o’ok u beeta’al, ti’al u k’uchul tak te’e kaaj tu’ux ku t’a’anal le t’aano’obo’.
Sutt’aan beetchaje’ ku kaxtik u yáantik máak ti’al u k’ajóoltik ba’alob yóok’lal le k’oja’ana’, yéetel u tse’elel tuukulo’ob yaan yóok’oli’, beyxan táan u chíikbesik noj meyaj ku beeta’al ti’al u yantal k’a’anan ba’alob yóok’lal u tojóolal máak ba’ale’ ich máasewal t’aan.
Myrna Ponce Palma, máax chíikbesik u múuch’il meyaj Armstrong Laboratorios de México, tu ya’alaj le meyaja’ béeychaj u k’ubik k’a’anan ts’íib yóok’lal u toj óolal kaaj ba’ale’ beyxan ti’al u yúuchul kaambal ti’ ba’ax yaan u yil yéetel ch’ich’il,
Yéetel túun le mokt’aana’, ku táakmuk’ta’al u yóol kmeyaj ti’al u ja’abil 2021, tumen yéetele’ ku kaxta’al u xo’ot’ol noj xáak’ab yaan ichilo’one’ex yéetel máasewal kaajo’ob yaan ti’ob ch’ich’il, ti’al beyo’ u yojéeltiko’ob uláak ba’al tu yóok’lal, yéetel ti’al u ts’a’akalo’ob je’el bix unaje’.
Daniel San Juan Orta, máax jo’olbesik CAMELICE, tu ya’alaje’, u k’oja’anil ch’ich’ile’ ma’ táan u yilik bix u máakil, mix bix u boonil u yoot’el, u ja’abil, ayik’al wa óotsil, le beetike’ táan u kaxta’al u tse’elel tuukul jets’a’an yóok’ol le k’oja’ana’ ti’al u beyo’ u yáanta’al kaaj ikil u kaxta’al u taasa’al utsil tu kuxtalo’ob.
Juan Gregorio Regino, máax jo’olbesik INALIe’, tu ki’imak óoltaj meyaj ku beeta’al tumen le je’elo’ ku chíimpoltik u páajtalilo’ob máasewal kaajo’ob, tumen ku náats’alo’ob ti’ k’a’anan ba’alo’ob, je’el bix yóok’lal ch’ich’il, ti’al u yojéeltiko’ob ba’axi’, ba’ax unaj u beetiko’ob, bix unaj u kaláantikubáaj máak yéetel tu’ux unaj u bino’ob ti’al u yáantalo’ob.
Xak'alutskíinsa'an tumen: Sasil Sánchez Chan
