Le lunes máanika’ k’a’anan k’iin ti’al u xak’altsikbalta’al meyajo’ob ku tukulta’al u beeta’al ti’al u yila’al ka tse’elek je’el ba’axak si’ipil ka ts’áabak kéen éensa’ak paal, ts’o’okole’ kex tumen u kúuchil Congresoe’ kaláanta’al tumen u xch’upul kanan kaajilo’ob Quintana Rooe’, u múuch’il Puntos Constitucionales, Justicia, Salud, Derechos Humanos y para la Igualdad de Género ma’ tu béeykunsaj u much’ik u yuumil ti’al u páajtal u yúuchul meyaj yéetel u jets’iko’ob wa ba’ax tumen ma’ táakpaj máaki’.
Yóok’lal ba’ax túun jets’a’an ti’ u k’iinilo’ob meyaj mokt’anta’ab yéetel Red Feminista Quintanarroense, ti’al le lunes máanika’, láas 13 oorase’ yaan ka’ach u meyaj le múuch’ilo’obo’; ba’ale’ máax jo’olbesik Comisión Puntos Constitucionales, Reyna Durán Ovando, tu ya’alaj ma’ páatchaj u bini’, kex tumen ila’abe’ bul semaanáae’ ma’ táakpaj ti’ mix jump’éel tsikbali’, Beey túuno’, láayli’ ti’ le múuch’ilo’ob meyaje’, ma’ xan táakpaj xdiputaadail Erika Castillo Acosta, ti’ Morena.
Diputada Lili Campos Miranda, ti’ u múuch’kabil Acción Nacional yéetel máax xan jo’olbesik Comisión de Justicia, ts’o’okili’ u je’ets’el ma’ chúukpaj u yuumil ka jk’uchi’, leti’e láayli’ xan táaka’an cihil Comisión de Puntos Constitucionales. Uláak’e’, leti’e máaxo’ob táakano’ob Comisión de Justicia, tu’ux yaan diputado’ob Carlos Hernández Blanco ti’ u múuch’kabil PRI; María Fernanda Trejo yéetel Cristina Torres, ti’ u múuch’kabil Morena.
También te puede interesar: Sin quórum en el Congreso para discutir despenalización del aborto en QRoo
“Ichil ba’ax jets’a’an ti’ u jaats ts’íibil 46e’ ti’ Reglamento de Comisiones del Poder Legislativo, ku ya’alike’ wa ma’ táan u yantal u yuumil ti’al u yúuchul xak’altsikbale’, unaj u beeta’al u ju’unil tu’ux ku tso’olol ba’ax úuchij, je’el bix xan ts’a’aban tu jaats ts’íibil 47 ti’ le Regramentoo’, beey tu ya’alaj xdiputadaail Judith Rodríguez Villanueva, máax táaka’an ichil u múuch’ meyajil Derechos Humanos táakpaj te’e súutuko’, kex tumen ma’ xan bin José de la Peña, ti’ PVEM, yéetel Ericka Castillo, ti’ Morena.
Beyxan te’e súutuko’ táakpaj diputadóo Edgar Gasca Arceo, máax jo’olbesik Comisión de Salud y Asistencia Social, kex mina’anchaj xan diputadáa Cristina Torres, ti’ Morena; Iris Mora Vallejo, ti’ Partido de la Revolución Democrática (PRD) yéetel xmorenista María Fernanda Trejo, máax ma’ táakpaj xan ti’ tsikbalo’ob beetchaj aantes.
Lunes xane’ leti’e yáax k’iin k’áata’an tumen diputadáa Teresa Atenea Gómez Ricalde, máax jo’olbesik Comisión para la Igualdad de Género, kex tumen a’almaj t’aane’ ma’ táan u jets’ik wa k’a’abéet u p’atik meyaj ku beetik ti’al u ketikubáaj ti’al u beetik u jo’olpóopil Isla Mujeres, tumen ma’ beey jets’a’an ich Ley de Procedimientos Electorales.
Waxaktúul diputado’ob much’ik ka’ap’éel ti’ jo’op’éel múuch’ilo’ob meyaj. Chéen unaj u yantal ka’ach juntúul ichilo’obi’ ti’al u páajtal u yúuchul tsikbal. Ti’al túun u páajtal u beeta’al sesione’ unaj u mo’okol ts’íib tumen u xsupleenteil diputadáa Atenea Gómez, Aurora Pool Cahuich, yéetel u yantal ka’ach u ya’abil diputado’ob táaka’ano’ob ich múuch’il meyajo’obi’.
Xak'alutskíinsa'an tumen: Sasil Sánchez Chan
