Máaxo’ob táakpaja’ano’ob Red Feminista Quintanarroensee’, tu k’a’aytaje’ tu tak pooltaj u múuch’il péektsiltik u yantal kuxtal, úuchik u ch’a’apachta’al Red tu píik’sáastalil le martes máanika’, tumen tupa’ab boono’ob beeta’an ka’ach te’e pak’o’obo’ tumen áaktibiistaob, tu táankabil Congreso.
Kex tumen ma’ jets’a’an máax beete’, tu xáak’abtaj ba’ax ku taal u beeta’al ti’al u kaláanta’al áaktibiistaob láayli’ p’aatalo’ob te’e Congresoo’, yéetel ku núup’ul xan yéetel u yóol u t’aan múuch’il péektsiltik u yantal kuxtal, tumen leti’obe’ u k’áatmajo’obe’ unaj “u sak bo’onol” le kúuchila’.
También te puede interesar: Denuncia la Red Feminista Quintanarroense ataque de grupos pro vida
“Ka’aj aajo’one’, k-ilike’ k’askúunta’ab yéetel sak boon ba’ax bona’ani’, xáanchaj táan u beeta’al yéetel tuláakal u yaabilajil máaxo’ob ku ba’atelo’ob ti’al u yantal jáalk’abil yéetel líik’saj t’aan. Taak xan k-a’alike’, to’one’ ma’ kk’áat ka utskíinta’ak ba’ax k’askúunta’ab, je’el bix k’áata’ab tumen máaxo’ob ts’áaj u sakil le pak’o’obo’; sáasil yanik úuchik u yóota’al balbil ba’ax taak kchíikbesik yéetel kboon, tu’ux takpoltik le jejeláas loobilajil ku beeta’al yóok’ol u ko’olelilo’ob Quintana Roo”, beey a’alab tumen u jejeláasil múuch’o’ob ti’ reedes sosiiales.
Juntúul ti’ máax táakpaja’an ti’ Red Feministae’ tu takpoltaje’ chéen taak u léeksa’alo’ob tumen u múuch’il máaxo’ob ma’ táan u éejentiko’ob ka tse’elek si’ipil kéen éensa’ak paal, tumen ojéela’an xane’, leti’obe’ páayt’aanajo’ob ti’al u bin bonbil yéetel sak u kúuchil congreso, ts’o’okole’ jo’oljeake’ k’ucho’ob yéetel sak píinttrurai’.
“Boono’ob k’askúunta’abe’, ku chíikbesiko’ob u jaajil ba’ax táan u yúuchul, kex tumen taak u beeta’al u ma’akal u chi’ob; ts’o’okole’ je’el bixake’, láayli’ leti’ ku taal u ts’áaej: u k’áato’ob ka kmak ek chi’”, beey tu ya’alaj juntúul ti’ leti’obi’, úuchik u ya’alik taak u yutskíintiko’ob boon k’askúunta’abij.
Tu ya’alaj xane’, chéen u k’áat ka pakta’ak máaxo’ob ma’ táan u éejentiko’ob ka luk’sa’ak u si’ipil kéen éensa’ak paal.
“Quintana Rooe’, ta’aytak u p’atik juntséelik jela’an ba’alob ku beetik ikil u p’atik paachil u páajtalil ko’olel, u luk’sa’al u si’ipil ko’olel ku yantal u yéensik paale’ ku ts’áak u páajtalil u jets’ik ba’ax u k’áat u beet ko’olel, chéen u beeta’al ba’al je’el bix kéen je’ets’ek, ba’ale’ ma’ jump’éel ba’al najmal u beeta’ali’”, beey tu ya’alaj úuchik u páayt’antik díiputadaas yéetel díiputadoos ti’al ma’ u sa’atalo’ob ti’ ba’ax k’a’anan.
Xak'alutskíinsa'an tumen: Sasil Sánchez Chan
