Máaxo’ob kun tsa’ayal ti’ob COVID-19 ka’alikil táan u beetiko’ob wa ba’ax meyajile’, unaj u ch’a’anukta’al beey sajbe’entsil ba’al ti’ meyaj, tumen u léejisladooro’ob u lu’umil Yucatáne’ tu jets’ajo’ob jo’oljeak te’e Congresoo’, u k’e’exel a’almajt’aan ti’al u béeyta’al u na’atal beyo’.
Yéetel ba’ax ts’o’ok u tsikbalta’ale’, unaj u yantal k’eexilo’ob ichil Ley de los Trabajadores al Servicio del Estado y Municipios de Yucatán, beyxan Ley de Seguridad Social para los Servidores Públicos del Estado de Yucatán, ti’ u Méek’tankaajilo’ob yéetel ti’ Organismos Públicos Coordinados y Descentralizados ti’ u lu’umil Yucatán.
También te puede interesar: Enfermar por COVID-19 ya es considerado riesgo laboral en Yucatán
U yúuchul le k’eexila’ péektsilta’ab tumen díiputado Manuel Armando Díaz Suárez, máax táaka’an ichil Partido Acción Nacional (PAN), ba’ale’ leti’e’ ku tukultik k’albe’en kuxtal yanchaj yéetel u k’oja’anil COVID-19e’ je’el u páajtal u yila’al beey jump’éel k’oja’an je’el u tsa’aytal kéen úuchuk meyaj.
Días Suáreze’, u je’ets’el sajbe’entsil u tsa’ayal ti’ máak le k’oja’ana’, noj xáak’ab ti’al maáxo’ob yano’ob Yucatán, tumen yaan lu’umo’obe’ láayli’ táan u tsikbalta’al wa le k’oja’ana’ sajbe’entsil ti’al ajmeyajo’ob.
“Unaj u yantal le páajtalil je’ela’ ti’ aj meyajo’ob tumen tu’ux ku bino’obe’ yaan u kaláanta’alo’ob yéetel je’el u asab ka’anal u kaláantikubáaj máak ti’ k’oja’ano’ob yéetel ti’al u yojéelta’al ba’ax unaj u beetiko’ob wa ku tsa’ayalti’obi’; je’el bix walkila’, yéetel COVID-19e’, yaan máaxo’ob ku séeb utstalo’ob, yaan xan uláak’o’obe’ ku xáantal kex ka’ap’éel wa óoxp’éel winalo’ob tu’ux ma’ táan u páajtal u meyaj máak, ts’o’okole’ ku luk’sa’al u bo’olilo’ob!, tu tsolaj diputadóo Díaz.
Beyxan tu ya’alaje’ wa ma’ táan u na’atal COVID-19 beey sajbe’entsil kéen úuchuk meyaj, ajmeyajo’obe’ chéen tu juunal p’ata’anob wa ku tsa’ayal ti’ob le k’oja’ana’, ts’o’okole’ je’el tak u tse’elel u meyajo’obi’.
Ichil meyajo’ob ma’ jáawak u beeta’al kex tumen táan u máan le pak’be’en k’oja’anila’, ti’ yaan máaxo’ob ku meyajo’ob ti’ éemerjensiias, kaambal, áadministrasiion, ichil uláak’o’ob. Díiputado péektsiltik le a’almaj t’aana’ tu ya’alaje’, u ya’abil máake’ ku meyaj kex ma’ uts kaláanta’ani’, tumen ma’ chéen leti’obi’, ti’ yaan xan u baatisl máak yéetel kaaj tu’ux kaja’ano’ob.
Beey túuno’, yéetel túumben jeets’ile’, máaxo’ob ts’áak meyaje’ unaj u kaláantik tuláakal u ajmeyajilo’ob tu táan le k’oja’ana’. Beyxan u laj beetiko’ob ba’al ti’al ma’ u tsa’ayal k’oja’an ti’ob: nu’ukul u kaláantikubáajo’ob, u yantal u nu’ukil u yantalo’ob te’e kúuchil meyajo’, ma’ u seen múuch’ul máaki’, ichil uláak’ ba’alo’ob.
Xak'alutskíinsa'an tumen: Sasil Sánchez Chan
