Red Feminista Quintanarroensee’ tu p’ataj tuka’atéen meyaj unaj kulukba’al ka’ach u múul beet yéetel u jala’achil le lu’umo’, tumen tu tukultaje’ tu tajkubáaj tu táan Legislativoo’ ikil táan u xak’alta’al jejeláas tuukul meyajo’ob ti’al u luk’sa’al si’ipil ku yantal kéen éensa’ak paal. Tu yaj óoltajo’ob u táanilkunsa’al ba’ax u k’áat lalaj díiputado’ob ichil poliitikáa ti’al ma’ u yu’ubiko’ob ba’ax táan ka’ach u ts’a’abal ojéeltbil ti’ ba’ax xak’alta’an yóok’lal meyajo’ob ku tukulta’al je’el u beetik utsil, le beetike’, ma’ páatchaj u beeta’al múul meyaj jets’a’an ka’ach yéetel XVI Legislatura, le beetik áaktibistaobe’ ma’ tu cha’ajo’ob u máan máak te’e kúuchilo’.
Ti’ jump’éel k’a’aytajil tsikbal beeta’abe’, Red Feminista Quintanarroensee’e tu ya’alaje’ kex luk’o’ob te’e meyaj ku beeta’alo’, leti’obe’ ti’ kun p’áatalo’ob te’e Congreso; le je’ela’ úuch tu jo’oloj ts’o’okbesa’ak u sesioon le komisiiono’obo’, tu’ux yaan ka’ach u je’ets’el u tse’elel si’ipil kéen éensa’ak paal.
También te puede interesar: Abandona la Red Feminista de QRoo mesa de trabajo con autoridades
Beey túuno’, ichil ba’ax mokt’anta’ab, tu k’iinil 10 ti’ febrero máaniko’, unaj ka’ach lejiisladooro’ob yéetel máaaxo’ob jo’olbesik u jaatsil komisiono’obe’, u ts’aatáantiko’ob tuukul meyajo’ob k’uba’ab yóok’lal sexual páajtalilo’ob yéetel ti’al u yantal u paalal ko’olel, le beetik najmal u tsikbalta’al ka’ach yéetel Junta de Gobierno y Coordinación Política (Jugocopo), ba’ax bíin beeta’ak ichil le k’iino’ob jets’a’abij, jach u xanile’, 24 ti’ febrero, ba’ale’ ma’ beetchaji’.
“Ma’ beeta’ab mokt’aan beetchaj ti’al u xak’alta’al tuukul meyajo’ob, tu jeele’, xaankúunsa’ab yéetel taka’ab ba’al tu beel koomisiono’ob tumen díiputadoo panista Eduardo Martinez Arcila, je’el bix xan tumen díiputaadas Reyna Durán Ovando, Kira Iris San, Aurora Pool Cahuich yéetel u díiputadoil PRI, Carlos Hernandez Blanco, máaxo’ob t’u’ulpacht ba’ax tu beetaj díiputado ma’ táak’an ti’ mix jump’éel komisiooni’, ts’o’okole’ ook meyaj chéen beey plurinominal”, tu ya’alajo’ob.
U tajkubáaj Eduardo Martínez Arcila yéetel Carlos Hernández Blanco ku na’atal tumen áaktibiistaob beey jump’éel bix u k’askúunta’al meyaj unaj u yantal yéetel jala’ach, Carlos Joaquín González, tumen u k’áat u xaankúunso’ob yéeyaj unaj u yantal ti’al u je’ets’el ba’al. Le beetike’, le je’ela’, u ka’atéen u p’a’atal meyaj unaj u múul beeta’al ka’ach ichil jala’achil yéetel Red Feminista.
Ichil ba’ax a’alab tumen jo’otúul ko’olel táaka’an ichil Rede’, tu tsikbaltajo’ob le jueves máanika’, u k’e’exel u 13 jaatsil u Almejeni A’almajt’aan le lu’umo’, je’el bix a’alab tumen Martínez Arcila, chéen táan u kaxtik ka’ach u xaankunsik yéetel u tselik páajtalil yaan ka’ach ti’al u je’ets’el ba’al tumen u ya’abil máako’ob yano’ob te’elo’, tumen unaj u éejenta’al tumen kex óox jaats ti’ kamp’éel chuka’an ti’al u béeytal, ts’o’okole’ wa tumen béeychaje’, u k’a’amal beey utsil tumen u ya’abil Ayuntamientos.
Tu takpooltajo’obe’, ba’ax táan u beeta’al tumen díiputadose’, chéen leti’ u k’atiko’ob ba’al tu beel meyaj ts’o’ok u xak’alta’al yéetel e’esa’an noja’an ti’al u páajtalil wíinik. Le beetike’, le jueves máanika’, tu tokajo’ob tuka’atéen Congreso yéetel ma’ tu cha’ajo’ob u máan mix máaki’.
Xak'alutskíinsa'an tumen: Sasil Sánchez Chan
