Ka’aj ts’o’ok u yúuchul tsikbal ichil XVI Legisladura yéetel Red Feminista Quintanarroensee’, tu’ux táakpaj xan jaytúul u máakilo’ob Comisión Nacional de los Derechos Humanos (CNDH), x-áaktibiistaobe’ tu k’a’aytajo’ob béeychaj u beeta’al túumben mokt’aano’ob.
Le beetike’, ka tu chukaj las 9 ti’ u ja’atskab k’iinil le lunes máanika’, páatchaj u ka’ okol u ajmeyajilo’ob u Congresoil Quintana Roo ti’al u meyajo’ob je’el bix suuka’anile’.
Bejla’a martes 2 ti’ marzoe’ u ka’ap’éel múuch’ilo’obe’ yaan u mokt’antiko’ob u ju’unil tu’ux ku je’ets’el ba’az k’iinilo’ob kéen ch’a’ajolta’ak tsikbalo’ob, jeets’ilo’ob yéetel yéeyajilo’ob ti’ le tuukul meyajo’ob k’uba’ab ti’al u páajtal u je’ets’el u páajtalil ko’olel te’e lu’umo’, ti’al u jets’ik ba’ax u k’áat u beet kéen yo’omchajak.
También te puede interesar: Llegan a nuevo acuerdo feministas y legisladores en QRoo
Ti’ jump’éel k’a’aytajil tsikbal beeta’ab tu kúuchil Legislativo ti’ u noj kaajil Cancúne’, máax jo’olbesik Junta de Gobierno y Coordinación Política (Jugocopo), Gustavo Miranda García, tu ya’alaj tuka’atéene’, ichil bin ba’ax mokt’anta’an yéetel Rede’, leti’obe’ unaj u beetiko’ob u tsikbalta’al u jejeláasil ba’alo’ob ti’al u je’ets’el ka luk’sa’ak si’ipil kéen éensa’ak paal, ti’al bejla’a martes yéetel miércoles te’e plenoo’.
Beyxan tu t’aanaj yóok’lal Partido Verde Ecologista de México, tumen te’elo’ lalaj díiputaadoe’ yaan u jets’ik u yéeyajil, ts’o’okole’ tu ts’áaj u na’ate’ leti’obe’ ma’ táan u éejentiko’ob tuukul meyaj. Beyxan Miranda Garcíae’ yaan u k’áatik ka ts’a’abak jayp’éel k’iino’ob ti’ ti’al u páajtal u péek meyaj yóok’lal jump’éel díiputasiion tu noj lu’umil México.
Xak'alutskíinsa'an tumen: Sasil Sánchez Chan
