Ikil u kaxta’al u mu’uk’ankúunsa’al u meyajil its’at ku taal u beeta’al ich maaya t’aane’ yéetel táankelemo’ob tu lu’umil Yucatán, u najil xook Escuela Superior de Artes de Yucatán yéetel u múuch’kabil Barrio Maya tu beetajo’ob jump’éel mokt’aan ti’al u múul meyajtiko’ob jump’éel jaatsxookil ku k’aaba’tik Haz Rap desde tu Celular 2021, yaan u káajal tu k’iinil 27 ti’ marzo tak 15 ti’ junio.
Haz Rap desde tu Celular ku kaxtik u ka’ansik táankelem paalal ku k’aayo’ob yéetel ku paaxo’ob, tu péetlu’umil Yucatán, ikil u láak’inta’alo’ob yéetel xooko’ob ti’ Internet, ti’al u beeta’al u paaxil rap ich maaya t’aan, jump’éel u jejeláasil hip hop.
También te puede interesar: 'Haz Rap desde tu Celular' convoca a jóvenes músicos de Yucatán
Kaambal xooke’ tukulta’an ti’al u chíimpolta’an u páajtalil wíinik, ts’o’okole’ ku péektsiltik u yantal jets’ óolal ichilo’obi’, beyxan ku ts’aatáantik ka yanak u páajtalil u kuxtalo’ob ich miatsil yéetel u yóolo’ob beey máasewal kaaj, tumen táan xan u kaxta’al u mu’uk’ankúunsa’al maaya t’aan, beey a’alab tumen máaxo’ob beey k’a’aytajil tsikbal.
Javier Álvarez Fuentes, máax jo’olbesik ESAYe’, tu ya’alaj úuch káajak u yúuchul meyaj ti’al u yantal u mokt’aanil le múul meyaja’; ts’o’okole’ jump’éel tuukul meyaj síij ichil u múuch’kabil Barrio Maya, ikil u kaxtik u ts’aatáantik, je’el bix k’a’abéete’, ba’ax táan u kuxtatik máak yóok’lal pak’be’en k’oja’an.
Beyxan tu ya’alaje’, páayt’aane’ ku beeta’al ti’al je’el máaxak ka u k’áat u kanej, ts’o’okole’ xma’ bo’olil; uláak’ páajtalil ti’ jump’éel túumben ba’al, je’el bix u k’aayil rap.
Álvarez Fuentese’, tu ya’alaj Haz Rap desde tu Celular, ku péektsiltik u beetik ba’al máak tu juunal, u ka’anal túumben ba’al, je’el bix xan u yúuchul múul meyaj, tumen chéen u káajbal ti’ noj meyaj ku taal tu paach k’iin ichil le ka’ap’éel mola’ayo’oba’.
Beyxan, jka’ansaj Guido Arcella, máax chíikbes u múuch’kabil Barrio Mayae’, tu ya’alaje’, jump’éel nojoch páajtalil ti’al je’el máaxak ka u yóot u káajs u yoksikubáaj ti’ paax; wa tak ti’al u ka’anal maaya t’aan, tumen meyaje’ ti’al máax yaan u ja’abil ichil 16 tak 30. Ts’o’okole’ yaan u xuulil u yuumil ti’al le xookila’.
Ichil ajka’ansajo’ob kun táakpajal te’e xookilo’oba’ ti’ yaan aj-its’ato’ob yéetel ajxak’al xooko’ob, je’el bix: Fernando Santandreu Guerrero, ti’ u xookil yóok’lal paax; Feliciano Sánchez Chan, ti’ u xookil maaya t’aan yéetel Zizinete Maravé Sosa, ti’al u péeksajil wíinkilal.
Ti’al u páajtal u yokol máak te’e kaambal xooko’, k’a’anan u yantal jump’éel séelular ma’alob u meyaj, ti’al u páajtal u yéensa’al u áaplikasiionil BandLab, tumen leti’ k’a’abéet ti’al u yúuchul meyaj. Beyxan unaj u yantal Internet ti’ máak kex chéen jump’éel oora ti’al u yéensa’al cha’ano’ob ku p’a’atali’.
Ti’al u yojéelta’al uláak’ ba’al yóok’lal u meyajil Haz Rap desde tu Celular je’el u páajtal u xak’alta’al u kúuchil Internet barriomaya.com, wa u túuxta’al ts’íib ti’ [email protected], wa u t’aan máak ti’ 5570805674, ti’al u páajtal u ts’a’abal ju’un unaj u chu’upul ti’al u ts’íibtik u k’aaba’ máak te’e xookila’.
Xak'alutskíinsa'an tumen: Sasil Sánchez Chan
