Foto: Juan Manuel Valdivia

Ikil u kaxta’al u chíibkesa’al u jejeláasil kuxtal yaan tu péetlu’umil Yucatán, ba’alche’ob yéetel xíiwo’obe’, u múuch’kabil Tlacuatzin A. C. yaan u beetik u múuch’tambalil 1er Foro de la Diversidad Biológica en Yucatán, tu’ux yaan u tsikbalta’al jejeláas ba’al yaan u yil yéetel le je’elo’. Múuch’tambale’ ti’ kun úuchul tu kúuchil Olimpo, tu yáax k’iinil octubre ku taala’, yéetel xma’ bo’olil u yokol máak.

Foro de la Diversidad Biológica en Yucatán yaan u múul beeta’al tumen u múuch’kabil Tlacuatzin yéetel u áayuntamientoil u kaajil Jo’; u tuukulile’ leti’ u ts’a’abal k’ajóoltbil jejeláas ba’al yaan u yil yéetel kuxtal ku yantal te’e baantao’.

Te’e yáax múuch’tambala’, yaan u táakpajal aj xak’al xooko’ob u meyajtmajo’ob jejeláas ba’al yóok’lal.
“Ti’ klu’umile’, kuxa’an u jejeláasil ba’alche’ob; ba’ale’ ya’abach ti’ leti’obe’ ma’ k’ajóoltano’obi’, le beetik ma’ táan u chíimpolta’alo’ob xan”, tu tsikbaltaj Enrique Valdez Escobedo, máax jo’olbesik Tlacuatzin A. C.

 

En español: Invitan a Foro de la Diversidad Biológica en Yucatán

 

Beey túuno’, ba’ax ku beetik wíinik, je’el bix u jelbesik ba’al ti’al ku k’a’abéetkunsa’al lu’um, u k’askúunta’al ba’al ti’al u líik’sa’al najo’ob yéetel u ko’onol ba’alche’ob kex ma’ unaje’, ku beetiko’ob u p’áatal kuxtal ich sajbe’entsil.

Kéen chúunsa’ak u meyajil múuch’tambale’, yaan u beeta’al u yáax tse’ekil “Loros mexicanos, su belleza e inteligencia los ha puesto en peligro”, tumen u x-xak’al xookil Vanessa Martínez. Kéen ts’o’okoke’, láas 10 ja’atskab k’iine’, yaan u beeta’al u tse’ekil “Vegetación nativa y especies útiles de la flora yucatanense”, tumen jxak’al xook Juan Tun; yéetel láas 11 ja’atskab k’iine’, x-xak’al xooko’ob Laura Meneses yéetel Luisa Ricóne’ yaan u tsikbaltiko’ob “Sociales, parásitas y ladronas: Hablemos de biodiversidad”.

Kéen ts’o’okok u chan súutukil je’elile’, jxak’al xook Adrián Cimé yaan u tse’ektik “Mamíferos silvestres en sistemas agroforestales”, ti’al u ye’esa’al kéen ts’o’okoke’ u meyajil “Catálogo de reptiles de la península de Yucatán, tumen Luis Díaz. Múuch’tambale’ yaan u ts’o’okol yéetel u tsikbalil “Los incomprendidos murciélagos”, yaan u beeta’al tumen Celia Selem.

 Xak'alutskíinsa'an tumen: Sasil Sánchez Chan