U mola’ayil Secretaría de Protección Civil, Prevención de Riesgos y Bomberos de Solidaridad (SPC) yaan u káajal u péek ti’al u takik u pool jump’éel ti’ le mola’ayo’ob máax ti’ p’ata’an ka u beet u jaatsil 5 Sur ti’ le Tren Mayao’, tumen le martes 6 ti’ diciembre máanika’, tu wa’wak’aj ba’al tu baantail Paamul, ba’ale’ u’uya’ab Puerto Aventuras.
César Orlando Flores Sánchez, máax jo’olbesik le mola’ayo’, tu tsolaje’ le ba’ax wak’a’abo’ beeta’ab tumen jump’éel ti’ le mola’ayo’ob ts’áak u nu’ukulil u beeta’al Tren Maya, ts’o’okole’ yaan u ju’unil ti’al u béeytal u beetik, chéen ba’axe’ “unaj ka’ach u beetik de ja’ajatsil, ba’ale’ jumpuul úuchik u beetik, le beetik u’uya’ab beyo’”.
Tu ya’alaje’ yaan u káajsa’al túun u ts’a’abal tak pool yóok’ol le mola’aya’, ti’al u yantal u bo’ol yóok’lal ba’ax tu beetaj. Le beyka’aj kun yantal u bo’olchajale’ yaan u je’ets’el tumen Secretaría Jurídica y Consultiva ti’ u Ayuntamientoil Solidaridad.
En español: Multarán a concesionaria del tramo 5 Sur del Tren Maya por explosión en Solidaridad
Ba’ax ma’ patal úuchik u beetik mola’aye’ “tumen ma’ tu beetaj je’el bix jeets’el ka’ach unaj u beeta’alo’. Tuláakal ba’ax ku beeta’ale’ unaj u beeta’al je’el bix tsikbalta’ab yéetel le kaajo’obo’ (tu’ux bíin máanak le treno’), ba’ale’ mola’aye’ ma’ talam tu yilaj u wak’ik jump’éelili’ ba’al ti’al tuláakal le k’áaxo’, le beetik jach u’uyabij”.
Ichil ba’ax a’alab tumen Flores Sáncheze’, meyajo’obe’ unaj tukulta’an kéen beeta’ak, ti’al beyo’ u ja’ajatsa’al, ti’al ma’ u jach loobilta’al yóok’ol kaab. Kéen beeta’ake’ unaj xan u ts’a’abal ojéeltbil tu táan Protección Civil, ba’ale’ le je’el xana’, ma’ beeta’abi’.
“Suuka’ane’ ku ya’aliko’ob, ts’o’okole’ kéen wa’ak’ak ba’al kex chan chichane’ ku beetiko’ob jach je’el bix jets’a’an unaj u beeta’alo’, ba’ale’ ti’al le je’ela’, píit máan u beetiko’ob”.
U jaatsil 5 Sure’ jóok’sa’ab óox jaats’ ti’, yéetel u meyajile’ t’oxa’ab ti’ óoxp’éel mola’ayo’ob, ka’aj p’ata’ab paachil Grupo México, ti’ le yáax tukulta’ab yaan u ts’a’abal le meyajo’. U chuuka’anil le bejo’ ku p’isik 67.665 kilómetros; u yáax jaatsile’, ku p’isik 27 kilometróos yéetel yaan u meyajta’al tumen u mola’ayil Mota-Engil; u ka’a jaatsile’, 20 kilometróos, yéetel unaj u beeta’al tumen Azvindi Ferroviario yéetel u yóox jaatsile’, 20.665 kilometróos, unaj u beeta’al tumen Consorcio ICA.
Xak'alutskíinsa'an tumen: Sasil Sánchez Chan
