Féederal jo’olpóopo’obe’ tu ts’áajo’ob k’ajóoltbil le lunes máanika’, bix yanik meyajo’ob táan u taal u beeta’al tu jaats bejil 4 ti’ le Tren Mayao’, beyxan tu tsikbalto’ob ka’ap’éel túumben k’áax táan u tukulta’al u súutul Áreas Naturales Protegidas (ANP) -San Mateo, tu kaajil Kaua, yéetel Tixcacal Quintero, tu méek’tankaajil Huhí-, uláak’ ba’ax tsikbalta’abe’ leti’e’ otel ku líik’sa’al naats’ ti’ u yúuchben kaajil Chichén Itzá.
U jaats bejil 4 Tren Mayae’ ku káajal tu kaajil Izamal tak Cancún, yéetel ku p’isik 239 kiloometróos. Ku máan ti’ bolonp’éel méek’tankaajo’ob, 17 u p’éel u kaajilo’ob Yucatán yéetel Quintana Roo. Yaan óoxp’éel u éestasyonilo’ob: Chichén Itzá, Saki’ yéetel u áaeropuertoil Cancún.
Beey túuno’, tu súutukil beeta’ab tsikbalil ichil u ja’atskab tse’ekil u jala’achil u noj lu’umil México, a’alabe’ tu éestasyonil Cancúne’ táan u beeta’al jump’éel táayer-kocheeráa ti’al chimes k’áak’, wa treeno’ob; ti’ le táan u beeta’al tu kaajil Saki’o’ táan u beeta’al jump’éel baasée ti’al u ts’a’abal máantenimiento ti’ le bejo’obo’.
En español: Tramo 4 del Tren Maya, con 200 km de vía terminada entre Izamal y Cancún
Ichil u jaats bejil 4 Tren Mayae’ ts’oka’an u meyajta’al 200 kiloometrosil bej; beyxan chúuka’an u 100 por siinetoil rieel k’a’abéet, chúuka’an u 90 por siientoil le durmieentes k’a’abéeto’, yéetel u 80 por siientoil balaastróo k’a’abéet.
María Luisa Albores, máax jo’olbesik Secretaría de Medio Ambiente y Recursos Naturales (Semarnat), tu tsikbaltaje’, yéetel k’áax ku tukulta’al u su’utul Áreas Naturales Protegidas de Yucatán táan u tukulta’al u táakbesa’al Reserva de la Biósfera Ría Lagartos.
IK’áaxo’ob k’uba’an ti’al u kaláanta’ale’, jeets’elo’ob tu’ux naats’ yanik kaaj, yéetel yaan kamp’éel tu lu’umil Yucatánl: El Zapotal (Tizimín), Centro de Educación Ambiental (Temozón), Ha’Bin ( Uayma) yéetel Kitam (Dzitas yéetel Tinum).
“Wa ka mu’uch’uko’obe’, tu lu’umil Yucatán ku chúukpajal 2 mil 509 u eektaareasil k’áax kaláanta’an; yéetel tu lu’umil Quintana Roo, tukulta’an xan u ts’a’abal uláak’ óoxp’éel k’áaxo’ob ti’al u kaláanta’al”, tu tsikbaltaj.
Leti’ xane’ tu ya’alaje’, yaan ka’ap’éel k’áax ku tukulta’al u je’ets’el beey túumben Áreas Destinadas Voluntariamente a la Conservación (ADVC) yéetel ti’ yano’ob Yucatán: San Mateo, Kaua, yéetel Tixcacal Quintero, Huhí.
Ka’alikile’, u mola’ayil Secretaría de la Defensa Nacional (Sedena) táan u meyaj ti’al u beeta’al u otelil Tren Maya, naats’ Chichén Itzá, táan u líik’sa’al ti’ jump’éel k’áax ku p’isik 19 eektareas.
Xak'alutskíinsa'an tumen: Sasil Sánchez Chan
