Angelina Aspuac, máax jo’olbesik Movimiento de Mujeres Tejedoras tu lu’umil Guatemala máax láayli’ beetik u jala’achil Sacatepéquez, tu páayt’antaj u diputadosil u kaajal le martes máana’ ti’al ka yanak u éejentiko’ob a’almajt’aaan ti’al u kaláanta’al u ba’alumbáaj u tuukul kaaj yéetel maaya chuuyo’ob.
Aspuac, kaqchikel ko’olele’, tu k’amaj tu lu’umil Berlín u noj chíimpolalil Premio Unidas a los Derechos de la Mujer y la Democracia ku k’u’ubul tumen Ministerio de Exteriores de Alemania, máax tu ya’alaje’, u iniciatiibail a’almajt’aane’ “láayli’ táan u xak’alta’al ti’al u éejenta’al”.
“Ts’o’ok kba’ateiltik, to’one’ táan klíik’sik a’almajt’aan ktukultik k’a’abéet to’on, táan kmeyajtik, táan kmúul jo’olbesik meyaj yéetel mola’aho’ob ti’al u yantal u a’almajt’aanil 6136, ti’al u kaláanta’al u propiedad intelectualil kaajo’ ti’ le chuuy ku beetiko’”, tu tsolaj.
En español: Mujer indígena urge al Congreso de Guatemala a garantizar derechos sobre los tejidos mayas
Ba’ale’, tu yaj óolataj le 160 u túul diputados yaan tu Congresoil Guatemalae’ “ts’o’ok u éejentik uláak’ a’almajt’aano’ob, ba’ale’ ma’ leti’e’ k’a’abéet ti’al u yutsil maaya kaajo’ob, mix xan máasewal ko’oleli’”.
“Péech’ óolale’ piim yanik, ts’o’oke’ ma’ tu cha’ak ka yanak a’almajt’aano’ob ti’al u yutsil máasewal kaajo’ob”, tu ya’alaj Aspuac, máax táaka’an xan tu múuch’kabil Asociación Femenina para el Desarrollo de Sacatepéquez (AFEDES).
Tu súutukil úuchik u k’amik chíimpolale’, tu takpoltaj “mola’ayo’ob ku ti’alintik yéetel ku konik ba’ax u ti’al kaaj, ts’o’oke’ ku yoksiko’ob saajkil to’on tumen ku ya’ako’ob yaan u jóok’siko’ob ju’un a’alik u ti’alo’ob, kex úuchben ba’al kana’ak tumen maaya kaajo’ob”.
Xak'alutskíinsa'an tumen: Sasil Sánchez Chan
