Máax jo’olbesik General del Instituto Mexicano del Seguro Social (IMSS), Zoé Robledo Aburto, tu ts’áaj k’ajóoltbil -tu súutukil beeta’ab mañanera tumen xjala’ach Claudia Sheinbaum le martes máanika’- le bin le 22 ti’ mayo máanika’ beeta’ab tu kúuchil IMSS ti’ u péetlu’umil Jaliscoe’, u IMSSe’ tu beetaj u yáax meyajil ti’al u ts’áak uláak’ puksi’ik’al ti’ u jeel máak; uts yanik xch’úupal yáax k’eexil puksi’ik’al ti’ juntúul xch’úupal u k’aaba’ Ariadna, máax 16 u ja’abil, k’oja’an desde ka’aj síijij.
En español: IMSS realiza el primer trasplante pediátrico de corazón; la adolescente se encuentra en recuperación
Ti’ jump’éel kóom cha’an k’i’itbesa’ab ti’ redes socialese’, Robledo Aburto tu ya’alaje’ tu káajbal le ja’aba’, u kúuchil Unidad Médica de Alta Especialidad del Hospital de Pediatría del Centro Médico Nacional de Occidente de Guadalajara tu k’amaj ti’ Comisión Federal para la Protección contra Riesgos Sanitarios (Cofepris) u páajtalil u beetik trasplantes cardíacos pediátricos, le beetik túune’, leti’e’ ka’ap’éel mola’ay ichil tuláakal u noj lu’umil México, yéetel Hospital Infantil tu noj kaajil Ciudad de México.
Meyaje’ beeta’ab ti’ Aridna, juntúul xch’úupal 16 u ja’abil, máax síij tu lu’umil Jalisco. Tak walkila’ uts yanik u toj óolal.
U meyajil ti’al u máansa’al ti’e’ xáanchaj maanal kamp’éel horas, yéetel puksi’ik’ale’ jóok’sa’ab Hospital General Zona No. 2 de Saltillo, Coahuila.
Xak'alutskíinsa'an tumen: Sasil Sánchez Chan
