Isaac del Toro láayli’ u ja’ak’sik u yóol máak. Jmexicoil xi’ipale’ máan táanil tu jaatsil 17 ichil u keetil Giro de Italia; yéetel le je’elo’ leti’ jp’áat u jo’olbes le keetilo’, yéetel náachchaj ti’ máax maas naats’ u taal tu paach, j-ecuadoril Richard Carapaz.
Tu ts’ook súutuke’, béeychaj u táanlachijal kex tumen ti’ yaan ka’ach tu yóox múuch’il. J-ensenadail xi’ipale’ tu ti’alintaj uláak’ jump’éel k’iin u nook’il Maglia Rosa, ka’alikil táan u binetik kanjaats ti’al u ts’o’okol keetil.
Ts’o’okole’, leti’e’ yáax jmexicoil máax u náajaltmaj jump’éel etapa tu jo’oloj 23 ja’abo’ob. Ba’ax tu béeykunsaj Isaace’ úuch tu súutukil káaj u ya’alal yaan u káajal u ka’anal u píixo’ob te’el nojoch múulo’.
En español: Sorprende Isaac del Toro al adueñarse de la etapa 17 del Giro de Italia
Kex beyo’, béeychaj u ka’ ch’a’ak bej kex tumen tu pe’ertaj jayp’éel segundos keetel yéetel le etapa tu beetaj anteso’. Carapaze’ tu ts’áajubáaj u chukpacht ti’al u ts’ook metrosil tu bejil Bormio, ba’ale’ Isaace’ tu ch’a’aj u muuk’ ti’al u máan táanil te’el italiail bejo’. Tu jo’oloj jaats 17e’, Del Toroe’ tu much’aj 65 horas, 30 minutos yéetel 34 segundos, ts’o’oke’ lelo’ ku chíikbesik 40 segundos táanilchaja’an ti’ Carapaz. Jfranciail, Romain Bardet, jp’áat tu ka’ kúuchil yéetel tu yóoxp’éele’ Carapaz.
Del Toroe’ leti’e’ pedalista maas táankelem u náajaltmaj jump’éel etapa ichil le siglo yaniko’ona’, ba’ale’ walkila’ táan u binetik u yáalka’abtik uláak’ 658 kilometros wa u k’áat p’áatal te’el yáax kúuchilo’.
Beyxan leti’e’ maas táankelem máax u béeykuns u p’a’atal ti’ Maglia Rosa kex bolonp’éel k’iino’ob, desde u ja’abil 1949. Ti’ le uláak’ jaatso’, jnat’ biklaobe’ yaan u chan je’elsikubáajo’ob ti’ u na’aksiko’ob múul ba’ale’ yaan u yáalka’abtiko’ob 144 kilómetros ichil Morbegno yéetel Cesano Maderno.
Xak'alutskíinsa'an tumen: Sasil Sánchez Chan
