U ajmeyaj máakilo’ob jejeláas ONG ku meyajo’ob Gazae’ tu ya’alajo’ob le martes máanika’, je’el u k’uchul bin u k’iinilo’ob wi’ijil je’el tak u beetik “u ch’éejel u pakabil wíinik”, ts’o’oke’ tu ya’alo’ob tuláakal paalal walkila’ ma’ t’a’aj u janalo’obe’ yaan u kíimilo’ob wa ma’ táan u ch’éejel “sajbe’entsil” yaan walkila’.
“U béeytal u k’uchul a jujump’éelil camiono’obe’, ma’ unaj u sa’atbesik ba’al tu yich yóok’ol kaab yóok’olal beyka’aj nojoch áantaj unaj u yantal ti’al kaaj (…) tak bejla’e’, ma’ in wil u yokol áantaj tu kaajil Gaza mix mantats’ mix nonoji’”, tu tsolaj Ghada AlHaddad ti’ u mola’ayil Oxfam.
AlHaddade’ juntúul ti’ le máaxo’ob ku meyaj ti’al u yáantik kaaj, máax t’aanaj ti’ k’a’aytajil tsikbal beeta’ab ti’ Internet, ts’o’oke’ tu ya’alaj le bix u ts’a’abal áantaj walkila’, je’ex le ku beetik u xwo’okin múuch’kabil Fundación Humanitaria para Gaza (GHF), “ma’ no’oja’an ti’al u yáantal kaaji’, chéen ch’aach’aj áantaj ti’al u sa’atbesa’al ba’al, ma’ ti’al u yutsil u kuxtal wíiniki’”.
En español: Todos los niños malnutridos en Gaza morirán si no se revierte situación, advierte ONG
Le martes máanika’, jejeláas u múuch’kabilo’ob ONUe’ tu tsikbaltajo’ob u sajbe’entsil u yantal, ti’ óoxtúul u kajnáalilo’ob Franjae’, maanal juntúul ku máansik k’iino’ob tu’ux ma’ táan u jaantik mixba’al, ts’o’oke’ ti’ óoxp’éel u t’o’olilo’ob wi’ijil jatsa’ane’, ts’o’ok u píitmáansa’al ka’ap’éeli’, beey a’alab tumemn u ts’ook Alerta de Clasificación Integrada de Seguridad Alimentaria (IPC).
Maanal 500 mil máako’ob (óoli’ u kan jaatsil u kaajnáalilo’ob Gazae) ku máansik u kuxtalo’ob yéetel ba’ax ku na’ata’al beey hambruna, ka’alikil u yalabil kaaje’, táan u kaxtik ba’ax u beetik yóok’olal beyka’aj wi’ijil ku máansiko’ob.
Beey túuno’, Tarek Loubani, jts’ak yaj jo’olbesik u múuch’kabil ONG Glia, tu ya’alaje’ mil 179 máako’ob ts’o’ok u kíimilo’ob tumen ma’ t’a’ajchaj u janalo’obi’, ts’o’oke’ tu ts’ook 24 horase’ yanchaj 22 u túul kimeno’ob tu yóok’olal- te’el kúuchilo’ob ts’akyaje’ ma’ táan u cha’abal u táakbesa’al tu xookil kimeno’obe’, máaxo’ob ku sa’atal u kuxtal yóok’olal wi’ij, ba’ale’ ku yantal xan uláak’ k’oja’ano’ob, le beetik ti’ le beyka’aj xoka’ane’, yaan uláak’ kex 10%.
Xak'alutskíinsa'an tumen: Sasil Sánchez Chan
