K'iintsil
Ap
06/08/2025 | Buenos Aires, Argentina
Sáask’ale’en ich kayo’ob péeknaj ti’ éek’jolch’e’en ja’ob. U coposil kimen xíiwo’ob, je’ex nievee’, ku báanalo’ob ti’ yóok’kabil yóok’ol kaab. Ts’u’uts’uk esponjas ku tíip’il tu chúukil u xíiwilo’ob k’áak’náab. Chéen u xmukul tsikbal jbiólogos ku juum ichil le ch’eench’enkilo’.
Transmisón en vivo beeta’ab ti’al u ye’esa’al u kuxtal u k’áak’náabil Atlántico Sur utschaj tu yich argentinoilo’ob.
Ajxak’al máako’ob yaan tu paach vehículo ku péeksa’al kex náach yaan máak yéetel ku ye’esik bix kuxtal tu taamil 4 mil metros yáanal ja’e’, tu ya’alajo’ob mix juntéen tu tukulto’ob wa meyaj ken u beeto’ob ti’ taamtam ja’obe’ yaan u jach uts k’a’amal ti’ redes sociales.
Streaming beeta’abe’ ku kóolik maanal 1.6 millonesil máak cha’antik sáansamal ti’ YouTube, ts’o’oke’ leti’e’ ba’ax ku tsikbalta’al ti’ kúuchilo’ob k’a’aytik péektsilo’ob yéetel tu ka’ tóoch’taj tsikbal yóok’olal taak’in kun tselbil ti’al u meyajta’al ciencia tu noj lu’umil Argentina ikil oka’an meyaj jala’ach Javier Milei.
“Jump’éel ba’al ku jach ki’imakúunsik k-óol tumen to’one’ k-k’áat k-k’i’itbes kmeyaj, ts’o’oke’ yaan táankelem wíinik tu biin u kanik ba’alo’ob yóok’olal k-k’áak’náabo’ob, ma’ xaan wa tu paachil k’iine’ yaan u yóotiko’ob okol ti’ científicoil meyaj”, tu ya’alaj Daniel Lauretta, máax jo’olbes le meyajo’.
U nu’ukulo’ob meyaje’, u cámarasil alta definición yéetel sensores jach túumbentak, robot ku máan xíinximbale’ ku chíikbesik ba’axo’ob seen yaan tu taamil ja’ Mar de Plata, ts’o’oke’ jach sáasil u ye’esik, je’ex mixjuntéen yáax béeyak u chíikbesa’alo’ob.
