Jpaapa León XIVe’ ma’ tu éejentaj le domingo máanika’ t’aano’ob a’alik Dyose’ ku na’atik -wa ku júustifikartik- ka yanak ba’ateltáambal, ts’o’oke’ paayalchi’inaj yóok’olal kristyaano’ob yaan Medio Oriente úuchik u beetik u miisail Domingo de Ramos tu táan ya’abach máako’ob k’uch tu k’íiwikil San Pedro.
Ka’alikil u ba’ateltáambalil Estados Unidos yéetel Israel tu táan Irán tu chukaj ka’ap’éel winalo’ob, yéetel kex táan u multa’al Ucrania tumen Rusiae’, paapae’ tu ya’alaj ka’aj tse’eknaje’ Dyoose’ “u noj k’iinil jets’eknakil” ts’o’oke’ ma’ táan u chíimpoltik ka yanak loobilaj yéetel ku méek’ik máaxo’ob ku péech’ óolta’alo’ob. “Láak’e’ex, le je’ela’ leti’ Kdyoosa’: Jesús, u noj k’iinil jets’eknakil, máax ma’ táan u chíimpoltik ba’ateltáambal, máax ma’ táan u béeytal u k’a’abéetkunsa’al u k’aaba’ ti’al u tso’olol ba’axten yaan ba’atelil, tumen leti’e’ ma’ táan u chíimpoltik ka yanak”. Máaxo’ob jo’olbesik péektsilo’ob ichil ba’ateltáambal yaan Iráne’ ts’o’ok u k’a’abéetkunsiko’ob réelijyon ti’al u tsoliko’ob ba’axten ku beetiko’ob le ba’ax ku beetiko’obo’.
En español: León XIV clama por la paz en su primer Domingo de Ramos: ''Depongan las armas, son hermanos''
Meyaj máako’ob ti’ u lu’umil Estados Unidose’ je’ex máax jo’olbesik Defensa, Pete Hegseth, ts’o’ok u ch’a’achibtiko’ob fe ku ts’áako’ob ti’ kristyaanail tuukul ti’al u ya’aliko’ob ba’ateltáambal táane’ ku yantal tumen jump’éel kaaj táan u ts’áakubáaj u p’atik paachil k’aak’as máako’ob yéetel míilitar muuk’.
Beey túuno’, Rusia xane’ ts’o’ok u tsolik ba’axten ku multik Ucrania tumen ku ya’alike’ “santa ba’ateltáambal” tu táan óoxidentaal kaaj, tumen ku tukultike’ k’aak’as ba’al tu’ux jeets’el.
Xak'alutskíinsa'an tumen: Sasil Sánchez Chan
