U jala’achil u noj lu’umil Brasil, Jair Bolsonaro, tu ts’áaj k’ajóoltbil le martes máanika’, ts’o’ok u je’ets’el tsaayal ti’ coronavirus yéetel táan bin u ts’akikubáaj yéetel hidroxicloroquina beyxan acitromicina.
Tu yáak’abil lunese’, Bolsonaroe’ tu beetaj u pruebail tia’l u yojéeta’al wa leti’ yaan ti’, beey úuchik u ts’a’abal k’ajóoltbil tumen u kúuchil jala’ach.
Ka’aj káaj u máan u k’oja’anil COVID- 19e’, populista jala’ache’ ma’ tu jach éejentaj wa jach jaaj k’aas le k’oja’ana’, le beetike’ ma’ tu ch’a’anuktaj u kaláantikubáaj je’el bix unaje’, kex tumen ti’al u taal u ts’o’okol junioe’, k’áatab ti’ ka u ts’áaj u piixchi’ tumen juntúul juez.
Beyxan ma’ uts úuchik u t’aan yóok’lal uláak’ ba’ax ku k’áata’al ti’ máak je’el bix u náachtal ti’ uláak’o’ob, kex tumen beey jets’a’an tumen Organización Mundial de la Salud.
U noj lu’umil Brasile’ leti’e’ tu’ux asab ya’ab máak ti’ yóok’ol kaab k’oja’an, tu paach Estados Unidos. Maanal ti’ 65 mil u túul máak ts’o’ok u kíimilo’ob yóok’lal COVID-19 ti’ Brasil, u asab nojoch lu’umil América Latina.
Ministro Luis María Aguilar ''guardó expediente'' de adeudo multimillonario de empresas de Salinas Pliego, dice el presidente
La Jornada Maya
El pleno inició la discusión de 71 reservas, aunque 22 serán enviadas al Diario de los Debates
La Jornada