Máax beetik u fiiskaalil ti' u lu'umil Quintana Rooe', Óscar Montes de Oca, tu ts'áaj k'ajóoltbile', tu ja'atskab k'iinil le miércoles máanika', macha'ab tu péetlu'umil Tabascoe' Isidoro G., máax ku tukulta'ale', leti' máax kíins juntúul máak táaka'an ichil LGBT+ kaaj, le 5 ti' junio máanika', tu baantail 231, ti' u méek'tankaajil Benito Juárez; yóok'lal loobilaj beeta'abe' ts'o'ok u yantal ya'abach líik'saj t'aan ichil jejeláas múuch'ilo'ob.
“Ka'aj ts'o'ok u ts'a'abal ojéeltbil kaxta'ab u wíinkilal juntúul kimen wíinike', yanchaj u k'a'alal le tu'ux úucho' ti'al u páajtal u yokol meyaj peritoos yéetel aj xak'al máako'ob, ti'al u kaxta'al yéetel u much'a'al tuláakal ba'ax ku páajtal tu yóok'lal ba'ax úuchij yéetel ti'al xan u beeta'al k'áatchi'ob", beey tu ya'alaj Montes de Oca.
También te puede interesar: Capturan a presunto asesino de persona de la comunidad LGBTTTI en Cancún
Wíinike' kíim úuchik u téejel u baakel u pool tumen ja'ats' yéetel jump'éel loolom ba'al (kuchiiyóo wa máaskab); ba'ale' le úuchik u tóoka'al u wíinkilale', ts'o'okili' u kíimil ka'aj beeta'ab ti'.
Máax macha'abe' ti' kaja'an ka'ach naats' ti' le wíinik kíinsa'abo', ts'o'okili' ma'ili' u kíinse', ti' yanchajo'ob junsúutuk tu yotoch le xi'ipalo'. Ka'aj ts'o'ok u loobiltike', Isidoroe' luk' te'e' najo', ka'aj púuts'ij.
“Úuchik túun u k'abéetkúunsa'al túumben nu'ukulo'ob ku meyaj tu kúuchil Centro de Control, Comando, Comunicación, Cómputo y Calidad, C5 beeyxan le yaan Fiscalía General ti' u lu'umil Quintana Rooe', béeychaj u yila'alale', le máax kiinsajnajo' Tabasco yaan, le beetike' yanchaj u k'áata'al áantaj ti' jo'olpóopil unaj u yáantaje', ti'al u béeytal u ma'achal", tu tsikbaltaj Montes De Oca, máax tu ts'áaj u níib óolal úuchik u yúuchul múul meyaj yéetel u mola'ayil Defensa Nacional yéetel Marina, Policía Quintana Roo yéetel Guardia Nacional, beyxan tu chíimpoltaj le meyaj béeychaj u múul beeta'al yéetel u jo'olpóopilo'ob Tabasco.
También te puede interesar: Colectivos LGBTTTI de QRoo piden esclarecer asesinato de joven homosexual
Ichil ba'ax j ts'a'ab k'ajóoltbil tumen Plataforma México, yóok’ol máax beet le loobilajo’ jets’a’an u ju’unil ti’al u ma’achal yóok’lal kíinsaj tu beetaj tu péetlu’umil Guanajuato. Xak’al xooke’, beeta’ab je’el bix jets’a’an unaj u yúuchul, tumen máaxo’ob ku meyaj ti’al ka yanak p’iis óol kéen úuchuk wa ba’ax tu’ux ka táakbesa’ak bix u sexual óol le wa máaxo’, wa tu’ux ka yanak ba’al u yil u xiibil wa u x ch’upul óol máak, beey a’ala’ab tumen Conferencia Nacional de Procuración de Justicia tu winalil diciembre, ti’ u ja’abil 2017.
Xak'alutskíinsa'an tumen: Sasil Sánchez Chan
