U jejeláasil múuch’kabilo’ob tu’ux ku yúuchul meyaj ti’al ka chíimpolta’ak sexual óolo’ob yaane’, tu líik’saj u t’aano’ob ti’al u ya’alik ma’ táan u éejentiko’ob úuchik u kíinsa’al juntúul xi’ipal, máax uts tu yich xiibo’ob, tu nojkaajil Cancún. Le beetike’ tu páayt’anjo’ob jo’olpóopo’ob ti’al ka beeta’ak u xaak’alil ba’ax úuchij, ba’ale’ tu yáamil u paakat u yóol xiib yéetel ko’olel, ti’al beyo’ u ts’a’abal u si’ipil máax beetej.
Ti’ jump’éel ts’íib túuxta’ab Fiscalía General del Estado, beyxan ti’ Comisión de Derechos Humanos del Estado de Quintana Roo yéetel ti’ u Ayuntamientoil Benito Juáreze’, múuch’kabilo’ob péektsiltik yéetel chíimpoltik LGBT+ kaaj, je’el bix Resilietxs, Playa Pride, Lambda, Redefine Quintana Roo yéetel Diversas, ichil uláak’o’obe’, tu líik’saj u t’aano’ob ti’al u k’áatiko’ob ka sáasilkúunsa’ak ba’ax úuchij.
También te puede interesar: Colectivos LGBTTTI de QRoo piden esclarecer asesinato de joven homosexual
“To’on beey LGBT+ múuch’kabilo’one’, ma’ táan k-éejentik mix jump’íit ba’ax úuchij, tumen jach táaj k’aas úuchik u beeta’al loobilaj tu táan k kaaj, tumen ba’ax úuche’ ku núup’ul yéetel uláak’ loobilaj ku beeta’al yóok’ol LGBT+ máak yaan tu péetlu’umil Quintana Roo. K k’a’ajsik ti’ u jo’olpóopilo’ob le lu’uma’, leti’obe’ tu mokt’antajo’ob Exhorto tu táan Fiscalía General del Estado yéetel XVI Legislatura ti’ u H. Congresoil u Péetlu’umil Quintana Roo, tumen te’elo’ tu jets’ajo’obe’ yaan u yilko’ob bix u meyajo’ob ba’ale’ yaan u yáax chíimpolta’al u páajtalil wíinik, beyxan ti’ máaxo’ob ku meyajo’ob te’elo’ yaan u ka’ansa’al ti’ob bix u nu’ukil u beeta’al ba’al ti’al u ts’aatáanta’al ba’ax ku beetiko’obi’”, beey u xo’okol te’e ts’íibo’.
Beyxan, ka’alikil táan u beeta’al, ti’ Internet, u mokt’aanil ti’al u yantal múul meyaj ichil u mola’ayil Comisión de Derechos Humanos del Estado de Quintana Roo yéetel u múuch’kabil Playa Pride, ikil táan u yáalkab u winalil u chíimpolta’al LGBT+ óole’, u nojochil kaláantik kaaj te’e lu’umo’, Marco Antonio Toh Euán, tu ya’alaje’, ti’al u kaxta’al ka xu’ulsa’ak p’eekil ku yantal yóok’ol LGBT+ kaaje’, jach k’a’anan u yantal múul meyaj yéetel u múuch’kabilo’ob kaaj, ts’o’okole’ tu k’a’aytaje’ u kúuchil Segunda Visitaduría General, ti’ yaan tu kaajil Cancúne’, yaan u ts’o’oksik u yilik tu beel ba’ax úuch yéetel le xi’ipala’, ts’o’okole’ ti’ kéen u beet tu táan Fiscalía General del Estado, ti’al u ts’aatáantik tuláakal ju’uno’ob yéetel ba’ax múuch’ ti’ le xaak’alila’.
También te puede interesar: Capturan a presunto asesino de persona de la comunidad LGBTTTI en Cancún
Jan Novak, máax jo’olbesik Playa Pride, tu ya’alaje’ unaj u seen meyajta’al ba’ax yaan u yil yéetel u páajtalil wíinik, tumen ba’ax ts’o’ok u yúuchul ti’ le ts’ook winalo’oba’, ku beetik u jach táaj yantal chi’ichnakil, ts’o’okole’ LGBT+ kaaje’ unaj u yutsil kuxtal, tu’ux mina’an péech’óolal mix p’eekili’.
Susana Hurtado Vallejo, máax chíikbesik u meyaj u jala’achil u lu’umil México ti’ u péetlu’umil Quintana Rooe’, yéetel máax t’ana’ab ti’al u beeta’al le mokt’aanilo’, tu ya’alaj le tu’ux ku meyajo’ yaan u jach kaláanta’al ka ts’o’okok u yila’al ba’ax úuchij, ts’o’okole’ yaan xan u beetik jejeláas múul meyaj yéetel u múuch’kabilo’ob kaaj, ti’al u kaláanta’al yéetel u péektsilta’al u páajtalil LGBT+ kaaj.
Beyxan Red Feminista Quintanarroensee’ tu líik’saj u t’aan tu yóok’lal: “u ta’akal loobilaj ku beeta’al yóok’lal p’eekile’, chéen ku táakmuk’tik péech’óolal yaan yóok’ol u jeel máaxo’ob yaanal bix u sexual óolo’ob. K-awat ti’al k-e’esik ma’ táan k-éejentik ka úuchuk ba’alo’ob je’el bix le je’ela’”.
También te puede interesar: Macha’ab máax ku tukulta’al kíins juntúul xi’ipa’al táaka’an ichil LGBTTTI kaaj
Xak'alutskíinsa'an tumen: Sasil Sánchez Chan
