Jo’oljeak 25 ti’ agostoe’, u yóoxtenil úuchik u beeta’al yéeytambal tumen Congreso del Estado, ti’al u je’ets’el wa ku éejenta’al wa ma’, ts’o’okol beel ichil xiib yéetel xiib wa ko’olel yéetel ko’olel. Ti’ le yéeyajo’ob yanchaje’, beey úuchik u chíikpajal tu ts’ook: 20 u túule’ tu éejentaj a’almajt’aan yéetel jo’otúule’ ma’atech.
También te puede interesar: Grupos pro y contra matrimonio igualitario se manifiestan frente a Congreso de Yucatán
Ka tu chukaj láas 17:12 oorase’ leti’ ka káaj u beeta’al yéeytambal tumen aj pat a’almajt’aano’ob ku yantalo’ob Congreso.
Ts’o’ok ka’atéen u yáax beeta’al le yéeytambala’, ba’ale’ bix úuchik u yúuchule’ ma’ páatchaj u yila’al tumen kaaji’, mix máak ojéelt máax tu éejentaj wa máax ma’i’, le beetike’ yanchaj ka’ap’éel áamparo j ts’a’ab tumen múuch’kabilo’ob yéetel máaxo’ob táaka’an ich LGBTTTIQ+ kaaj, tumen leti’ máaxo’ob ku ba’atelo’ob ti’al ka chíimpolta’ak u páajtalilo’ob.
También te puede interesar: Aprueban matrimonio igualitario en Yucatán
Tu k’iinil 10 ti’ abril ti’ u ja’abil 2019e’, leti’ ka yáax beeta’ab yéeytambal tu lu’umil Yucatán, ba’ale’ ka beeta’abe’, láayli’ k’ala’ab joolnaji’, ma’ j cha’ab u yila’al bix úuchik u beeta’al; ti’al u k’iinil 15 ti’ julioe’, ka’a beeta’ab yéeytambal, kex tumen ti’al le k’inakil je’elo’, ts’o’okili’ u yantal áaktibistaob tu k’áatajo’ob ka ts’a’abak ojéetbil tu táan kaaj bix u yúuchul le yéeyajo’.
Úuchik túun u ts’a’abal le ka’ap’éel áamparoso’, le 18 ti’ agosto máaniko’, Suprema Corte de Justicia de la Nación (SCJN) tu jets’aj ma’ no’oja’an úuchik u beeta’al le yáax ka’ap’éel yéeytambalo’obo’, le beetike’, u yóoxtéenil úuchik u beeta’ale’, yanchaj u ts’a’abal ojéetbil bix beeta’abik le meyajo’ tumen Legislatura LXII, ti’al u páajtal u yila’al tumen kaaj.
También te puede interesar: Festejan en el Monumento a la Patria aprobación del matrimonio igualitario
Xak'alutskíinsa'an tumen: Sasil Sánchez Chan
