de

del

Yanchaj kex 1.3 miyoonesil máak bin sáasil ti’ jo’oljeak, tu petenil Yucatán

Apagón en Yucatán, QRoo y Campeche: 1.3 millones de usuarios afectados
Foto: Fernando Eloy

Tu ja’atskab k’iinil le miércoles 22 ti’ junio máanika’, bin sáasil ti’ u ya’abil u méek’tankaajilo’ob Yucatán, Quintana Roo yéetel Kaanpech; xáanchaj kex 40 minutóos biinja’an, ts’o’okole’ tu p’ataj xma’ sáasil kex 1.3 miyoonesil máak, beey úuchik u ya’alal tumen Comisión Federal de Electricidad.


Tu noj kaajil Jo’e’, bin ka tu chukaj kex láas 8:30 ja’atskab k’iin; p’áat mina’an sáasil tu múuch’kajtalilo’ob chúumuk, noojol, lak’in yéetel chik’in. Ba’ale’ beyxan úuchik ti’ uláak’ u méek’tankaajilo’ob Yucatán, je’el bix Progreso yéetel Conkal. Ba’ale’ beyxan u’uyab tak tu lu’umil Kaanpech yéetel Quintana Roo je’el bix Cancún, Tulum, Chetumal yéetel Playa del Carmen.


Ka’aj yáax t’aanaj CFEe’ tu ya’alaje’, bin sáasil tumen yaan ba’ax úuch ti’ u beelil Transmisión ku meyaj yéetel 400 KV, ts’o’okole’ tuláakal u petenil yucatán u’uyabij. Ma’ sáame’, tu ya’alaj, tu súutukil 08:32 yéetel 8:40 ja’atskab k’iine’ ch’éen u meyaj wakp’éel u beelil aalta tension, le beetike’ p’áat mina’an sáasil kex ti’ u 62 por siientoil kaaj yaan tu noojol-lak’inil México.

 

También te puede interesar: Apagón en Yucatán, QRoo y Campeche: 1.3 millones de usuarios afectados


CFEe’ tu ya’alaje’, le je’elo’ úuch tumen yaan ba’ax úuch ti’ juntúul u meyajnáalil táan ka’ach u meyaj ti’ jump’éel u beelil le aalta tensiono’; ba’ale’ tu séeba’anil úuchik u yáanta’al yéetel kaláanta’al walkila’.


Tu péetlu’umil Yucatáne’ yanchaj 681 mil 950 u túul máak p’áat mina’an sáasil ti’; tu lu’umil Quintana Rooe’ yanchaj kex 619 mil 612 u túul bin sáasil ti’, yéetel Kaanpeche’ kex 20 mil 938.
Ka tu chukaj láas 10:55 ja’atskab k’iine’, CFEe’ tu ya’alaje’ ts’o’okili’ u su’utul sáasil kex ti’ 479 mil 788 máako’ob ti’ le petenila’. Yéetel jump’íit maanal ti’ láas 12e’ a’alab tumen Centro Nacional de Control de Energía (CENACE) ts’o’okili’ u su’utul ti’ tuláakal máak le sáasilo’.  

Xak'alutskíinsa'an tumen: Sasil Sánchez Chan