140 u túul máak ts’o’ok u kíimil úuchik u búulul jayp’éel u kaajilo’ob China; sajbe’entsil yanik Wuhan

Le 13 ti’ julio máanika’ yanchaj kaajo’ob tu chúumukil yéetel ti’ lak’inil Chinae’, jbúulo’ob úuchak u búululu xan jump’éel áak’al tu kaajil Jiujiang, ti’ u méek’tan kaajil Jiangxi, China. Búul úuch te’e kaajo’obe’ ts’o’ok u beetik u kíimil wa u sa’atal 140 u túul máak, ts’o’okole’ ja’e’ ma’ náahc yanik ti’ uláak’ u kaajilo’ob Wuhan, tu’ux yáax ila’ab u túumben k’oja’anil coronavirus tu winalil diciembre.

Te’e noj kaajo’ yaan 11 millonesil máako’ob, ts’o’okole’ táaka’an ichil le kaajo’ob táan u jach ch’úukta’alo’ob tumen táan u na’akal u ja’il Yanhtsé, u asab chowak ríol China. 6 mil km u chowakil, ts’o’okole’ walkila’ u ja’ile’ ts’o’ok u chukik u yóox chíikulal yáax jeets’el ti’al u yila’al tak tu’ux ka’anchaja’an u ja’il tu k’ajla’ayil Wuhan, beey a’alabik tumen jump’éel kúuchil k’a’aytik péektislo’ob.

Cháak káaj u k’áaxal tu winalil junioe’ tu beetaj u seen búulul u baantail noojol.

Tak walkila’ jala’achobe’ ts’o’ok u xokik tak 141 u túul máak kimen wa saatal, 28 mil u p’éel naj ts’o’ok u k’astal yéetel kex 38 millonesil kajnáalo’ob yaan k’a’abéet ti’ob áantaj, Le p’is k’iinil máaniko’, láayli’ jach k’a’amchaj ja’, ts’o’okole’ walkila’ yaan 33 u p’éel u beel ja’ jach ts’o’ok u chu’upulo’ob, le beetike’ ts’o’ok xan u k’a’aytal sajbe’entsil yanik 433 u p’éel río’ob, beey k’a’ayta’ab tumen u kúuchil Recursos Hídricos.

Edición: Ana Ordaz