U ya’abtal meyaj ku beeta’al tu kúuchil jáayal péepen k’áak’ ti’ u noj kaajil Jo’, Manuel Crescencio Rejón, jach séeba’an u bin: tu yáax wakp’éel winalo’ob u ja’abil 202e’ xoka’ab yanchaj 431 mil 934 u túul páasajeróos, ts’o’okole’, ti’ le ts’ook wakp’éel ja’abo’oba’ k’uch tak 888 mil 189 u túul páasajeróos; lela’ tu chíibkesaj ya’abchaj 105 por siiento, beey tu ts’áaj k’ajóoltbil Aeropuertos y Servicios Auxiliares, ti’ u mola’ayil Secretaría de Infraestructura, Comunicaciones y Transportes.
Kúuchile’ táaka’an ichil le 30 u p’éelal asab ya’ab máax k’a’abéetkunsik ti’al u bino’ob wa tu’ux, tumen ti’ yaan tu waxakp’éel kúuchil, tu paach le yaan Ciudad de México, Cancún, Guadalajara, Tijuana, Monterrey, Los Cabos yéetel Puerto Vallarta.
U yantal uláak’ jejeláas tu’ux u bin máak kéen luk’uk tu kúuchil Crescencio Rejón tu bin u ya’abkunsa’al, ts’o’okole’ chéen ti’al u káajbal le winala’, k’a’ayta’ab uláak’ túumben bej ku k’uchul tak Puebla, tumen u mola’ayil Viva Aerobus; le je’ela’ leti’e’ asab ya’ab kaajo’ob ku k’ujsik tak tu kaajil Jo’.
En español:A pasos agigantados crece actividad del Aeropuerto Internacional Manuel Crescencio Rejón de Mérida
Óoxlajunp’éel bejo’ob u jóok’smaj le mola’ayo’. Ku k’ujsik máak tak Ciudad de México (AICM), Guadalajara, León, Monterrey, Querétaro, Toluca, Tuxtla Gutiérrez, Veracruz, Villahermosa, Puebla, La Habana, Santa Clara yéetel Camagüey, le óoxp’éel ts’ooko’oba’, tak tu lu’umil Cuba.
Ichil u winalilo’ob enero tak junio ti’ u ja’abil 2023e’, Viva Aerobuse’ tu k’ujsaj maanal 670 mil u túul páasajeróos, 36 por siento maanal ti’ le beyka’aj yanchaj láayli’ te’e jats k’iino’obo’, ba’ale’ ti’ le ja’ab máaniko’, le beetik mola’aye’ ku p’áatal xan beey aerolínea asab ya’ab máak ku kóojsik yéetel ku jóok’sik tu kaajil Jo’, tumen láayli’ te’e jats k’iino’obo’ yanchaj 888 mil 189 u túul máak k’a’abéetkuns tuláakal le areolineaso’, ts’o’okole’ lelo’ ku chíikbesik Viva Aerobuse’ tu máansaj u 75 por sientoil máaxo’ob byajarnajo’ob.
Tu yáax wakp’éel winalo’ob 2021e’, u kúuchil péepen k’áak’ tu noj kaajil Jo’e’, tu k’amaj 431 mil 934 u túul máako’ob, ba’ale’ ti’al u ja’abil 2022, láayli’ te’e jaats k’iino’obo’
k’uch tak 667 mil 828 u túulal yéetel ti’al 2023e’ jnáak 888 mil 189 u túulal.
Yóok’lal bix táan u yila’al kun ya’abtal u k’uchul máak te’elo’, ti’al u yáax wakp’éel winalo’ob 2024e’, wa ka k’uchuk tu 43 por siento je’el bix úuch ti’ le ts’ook ka’ap’éel ja’abo’oba’, yaan u máansik jump’éel miyoon páasajeroosi’, ts’o’okole’ yaan uláak’ jump’éel mola’ay Mexicana de Aviación, kun káajal u meyaj ti’al u winalil septiembre, tu’ux láayli’ táaka’an Jo’.
Xak'alutskíinsa'an tumen: Sasil Sánchez Chan
