de

del

Foto: Ana Ramírez

U kóontinentail baantail Isla Mujerese’ ts’o’ok u jach táaj nojochtal ti’ le ts’ook ja’abo’oba’, ts’o’okole’ beey u tukulta’al kéen úuchuk ti’ le ja’ab ku taalo’oba’, tak kéen áanak 30 mil u tu’uk’il wu’ulabil, yéetel u yantal u k’a’abéetchajal ti’al kex 480 mil u túul máak. 

Ichil ba’ax a’alab tumen máax jo’olbesik Asociación Mexicana de Profesionales Inmobiliarios (AMPI) Cancún, Miguel Ángel Lemus, u kóontinental baantail Isla Mujerese’ yaan u páajtal u jóok’sa’al óox noj jaatsi’: u ti’al Playa Mujeres, Costa Mujeres yéetel Isla Blanca.

“Beey túuno’, táan k tukultik tu ts’ooke’, yaan u yantal óoli’ 30 mil u tu’uk’ilo’ob wu’ulabil ichil Isla Blanca, Costa Mujeres yéetel Playa Mujeres, ba’ale’ beyxan yéetel le beyka’aj uláak’ ku yantal tu baantail Fátima San Javier”, tu ya’alaj. 

Yóok’lal bix táan u yila’al kun nojochtale’, táan u binetik u beeta’al jump’éel noj xaak’al te’e baantao’, ti’al u béeytal u ts’a’abal u yotoch yéetel ba’ax k’a’abéet ti’ kajnáalo’ob yaan u yantalo’ob te’elo’, tumen leti’ kun káajal u yantal kéen káajak u k’a’amal máak ti’ le otelo’obo’, tu tsikbaltaj.  

Wa ku tukulta’al kaada juntúul ajmeyaje’ méek’a’an tumen jump’éel baatsil tu’ux yaan kantúul u láak’e’, ku múuch’ul óoli’ 480 mil kajnáalo’ob te’e tu kóontinental baantail, Rancho Viejo yéetel Ciudad Mujeres, le beetike’ yaan u yantal u meyajta’al tumen jo’olpóopoo’ob, tu’ux ka ts’a’abak ba’ax k’a’abéet ti’ máak ti’al u kuxtal tu beel, u kaláanta’al u toj óolal, u yantal tu’ux u kaambal yéetel ba’al u manej.

 

También te puede interesar: Proyectan 30 mil habitaciones para la zona continental de Isla Mujeres

 

Playa Mujeres, tu tsikbaltaj, ma’alob u xíimbal, yaan otelo’obi’, u kaamposil golf, múuch’kajtalo’ob, kananil yéetel un jeel ba’al k’a’abéet ti’al u yutsil yantal ba’ali’, tumen walkila’ yaan ichil 10 tak 12 mil u tu’uk’il wu’ulabil otel.  

Tu baantail Costa Mujeres, yaan kex 15 u p’éel u k’áaxil otelo’ob, tuláakalo’obe’ kona’an, yéetel yaan u páajtalil u beeta’al kex 12 mil u p’éel u tu’uk’o’ob wu’ulabil.

“Kaajo’obe’ utsil tukulta’an bix kun líik’sbilo’obi’, tumen láayli’ xan tukulta’an bix u kaláanta’al yóok’ol kaab, ti’al ma’ u loobilta’ali’, le beetik jts’a’ab u plaantasil tráatamiento, yéetel tuláakal ba’ax ku k’áata’al tumen CFE, beyxan CAPA ti’al le ja’o’, ichil uláak’ ba’alob”, tu tsikbaltaj.

Kéen ts’o’okok le baantailo’obo’, ti’ yaan Fátima San Javier, tu’ux ma’ kaláanta’an bix líiks’a’anili’, tumen yaan k’áaxo’ob chéen beyo’, ma’ jach jeets’el máax u yuumili’, wa bix yaniko’obi’, tu paache’ ti’ yaan féederal k’áax yéetel u baantail jáal ja’ jach k’ajóolta’an.

Ti’ túun ku káajal Isla Blanca, yaan kex 800 u ektaareasil k’áax, óoxmúuch’ u yuumil yaan, máaxo’ob ts’o’ok u beetiko’ob noj tuukul meyaj ti’al u líik’sa’al ba’al tu beel, tu’ux ku je’ets’el bix kun k’a’abéetkunsa’al lu’um, ba’ale’ ma’ ch’a’abak u t’aanil ti’al u je’ets’el bix kéen beeta’ak u bejil u yokol máaki’.

 

También te puede interesar: 

-Isla Mujeres, destino con una historia de más de 170 años

-Mantiene Isla Mujeres ocupación hotelera promedio de 70 por ciento

-Playas sin sargazo y gastronomía, un plus en el crecimiento de Isla Mujeres

-Seguridad y protección del turista, vitales para autoridades de Isla Mujeres

-Extranjeros, los principales clientes de las artesanías de Isla Mujeres

-Isla Mujeres, peten ts’o’ok maanal 170 ja’abo’ob káajak u ts’íibtik u k’ajla’ayil

Xak'alutskíinsa'an tumen: Sasil Sánchez Chan