Foto: Ap

Tumen ts’o’ok u seen ya’abtal máaxo’ob ku lúubul u yóole’ yéetel máaxo’ob ku kíinsikubáajo’ob tu péetlu’umil Yucatáne’, káaj u yantal u jejeláasil áantaj ti’al máax k’oja’an u tuukul.

Jump’éele’ leti’ le je’ela’: ECO: Escuela de Conciencia, kúuchil tu’ux ku kaxta’al u k’éexel máak ba’ale’ beyxan u jeelo’ob, ku yáanta’al máak ti’ reedes sosyales, beyxan ku ts’a’abal kaambal xooko’ob, ichil uláak’ ba’alo’ob.

Ichil u ja’abil 2020, u mola’ayil Instituto Nacional de Estadística y Geografía (INEGI), tu ya’alaje’, tu péetlu’umil Yucatáne’ yanchaj u taasail 10.2, ichil lu’umo’ob tu’ux asab ya’ab u kíinsikubáaj máak ichil lalaj 100 mil kajnáalo’ob, le beetik ti’ yanchaj tu yóox kúuchil. Yáaxe’ ti’ yaan u péetlu’umil Chihuahua, tu’ux k’uch tak 14.0 u taasail yéetel u ka’a kúuchile’ u ti’al Aguascalientes, tu’ux yanchaj 11.1.

Ichil ba’ax j ts’a’ab k’ajóoltbil tumen Boletín Epidemiológico, ku beeta’al tumen Secretaría de Salud ti’ u noj lu’umil México, tu péetlu’umil Yucatáne’ yanchaj mil 652 u túul máak tsa’ay ti’ luubul óol tu ja’abil 2021, 430 u túule’ xiib yéetel 1221e’ ko’olel. Le je’elo’ ku ye’esik ya’abchaj u 70 por siientoil wa ku ke’etel yéetel le beyka’aj yanchaj tu ja’abil 2020, tu’ux xoka’ab 970 u túulal.  

J sikiaatra Gaspar Baquedano López, máax jo’olbesik ECO tu tsolaje’, úuchik u yila’al ya’abchaj máak ku kíinsikubáaj te’e péetlu’uma’, leti’ ka tukulta’ab u beeta’al le meyaja’ walkil kamp’éel ja’abo’oba’.  

Lalaj jo’olajun k’iino’obe’ ku beeta’al tsikbalo’ob ti’ Facebook, beyxan kaambal xook ti’al u kanik u k’ajóoltikubáaj máak, ichil uláak’ ba’alo’ob. 

Ti’al túun u yáanta’al máax luba’an u yóole’, patjo’olta’ab u múuch’il “Red de apoyo si vives sola o solo en Yucatán” tu’ux ku yáanta’al yéetel ku k’a’ayta’al ba’ax ku páajtal u beeta’al ti’al u yila’al ma’ u kíinsikubáaj máak ti’ le péetlu’uma’.  Ti’al u yojéelta’al uláak’ ba’ale’ ku páajtal u t’aan máak te’ela’: 999 315 7694; 9991101917; wa u xak’alta’al u kúuchilo’ob:  https://www.facebook.com/ECOescueladeconciencia yéetel https://www.facebook.com/groups/327044909015102

También te puede interesar:

-La depresión no es castigo, es enfermedad que requiere compañía

-Depresión postparto, un tema tabú que se habla poco

-Aumentan servicios de sicólogos por trastornos anímicos en Campeche

-Surgen opciones para apoyar a personas con problemas de salud mental en Yucatán

-El CBD como aliado en la lucha contra la depresión: un caso de éxito

-Nonojchaj u k’a’abéetkunsa’al áantaj ti’al u tuukul wíinik ikil u chíikpajal yaan ya’abach máak ku lúubul u yóol

 

Xak'alutskíinsa'an tumen: Sasil Sánchez Chan