Tu péetlu’umil Quintana Rooe’ xoka’an yaan kex 95 mil u túul jmeen pak’o’ob jeets’el táan u meyajo’ob, ba’ale’ ti’ le je’elo’, u 30 por siientoile’ ma’ táakbesa’an u k’aaba’ ti’ seguróo sosial, le beetik te’e ja’aba’, táan u kaxta’al ka ts’íibta’ak u k’aaba’ te’e seguróo tumen mola’ayo’ob t’anko’ob meyaj, beey tu tsikbaltaj José Juan Chilón, u noj meyajnáalil Sindicato Independiente de Trabajadores y Empleados Constructores ti’ le péetlu’umo’ Quintana Roo.
Le beetike’, ikil táan u máan u k’iinil Kili’ich Cruuse’, suuka’an u k’iimbesa’al laláaj 3 ti’ mayo, tu’ux xan ku k’a’ajsa’al tuláakal jmeen pak’o’obe’, yaan u je’ets’el mokt’aan yéetel Cámara Mexicana de la Construcción, ti’al ka ts’aatáanta’ak u ts’a’abal ti’ob u nu’ukulil u kaláantikubáajo’ob ka’alikil táan u meyajo’ob. Tumen ichil jump’éel p’iisk’iine’ ku yúuchul loobilaj ti’ jmeen pak’o’ob kex 70 u téenal ka’alikil táan u meyajo’ob, ba’ale’ ma’ káajak u máan kaláantbil bix u meyajo’obi’.
También te puede interesar: El 30 por ciento de los trabajadores de la construcción de QRoo no tiene seguridad social
Beey túuno’, ichil mokt’aan kun je’ets’ele’ tukulta’an u yila’al ka yanak múul meyaj ichil Secretaría del Trabajo yéetel Centro Federal del Trabajo, ti’al u ts’aatáantiko’ob ka utsil beeta’ak ba’al tumen síindikato’ob, ts’o’okole’ yaan xan u yantal u beeta’al yéeytambal ti’al u je’ets’el wa ku éejenta’al kóontrato ti’al múuch’o’ob meyaj, tu’ux unaj u táakbesa’al xan u mokts’íibil jmeen pak’o’ob, ichil uláak’ ba’alo’ob yaan u k’éexel.
“Le viernes máaniko’ yanchaj u yáax kaambal xookil ti’al u ye’esa’al u nu’ukilo’ob kananil yéetel toj óolal; walkila’ máax ma’ táan u ts’aatáantiko’ob u páajtalil wíinik kéen u ts’áajo’ob meyaj jbeet pak’o’obe’ je’el tak u biinsbil k’albil ti’al u ts’a’abal u si’ipil yóok’lal”, tu tsikbaltaj José Juan Chilón.
Beyxan yaan u beeta’al uláak’ mokt’aano’ob yéetel Seguro Social, Protección Civil, INEA, ichil uláak’ mola’ayo’ob, ti’al u kaxta’al ka ma’alobkúunsa’ak bix u meyaj jbeet pak’o’ob.
Ti’ le 95 mil jmeyajo’ob yaane’, chéen u 40 por siientoil ku tukulta’al yaan ka’ach ma’ili’ káajak pak’be’en k’oja’an, ba’ale’ ts’o’ok xan u yéemel le jaytúul jmeyajo’ob yaan, ma’ tumen mina’an meyaji’, tumen mina’an ba’ax ku yutstal u beetiko’ob, ba’ale’ le je’elo’ ku tukulta’al ku yúuhchul tumen táan xan u nojochtal ba’al tu péetlu’umil Yucatán.
También te puede interesar:
-Albañiles yucatecos se recuperan tras pandemia: Sindicato de Alarifes
-El 30 por ciento de los trabajadores de la construcción de QRoo no tiene seguridad social
-Retoman festejo de la Santa Cruz en obras de Tulum tras paro por la pandemia
-Los obreros campechanos que trabajan en el Tren Maya tienen Seguro Social: Carso
-CMIC Yucatán apuesta a capacitación y certificación de albañiles
-Albañiles de Tulum solicitan seguridad en obras y en la calle
-No es necesario ser albañil para celebrar la Santa Cruz
Xak'alutskíinsa'an tumen: Sasil Sánchez Chan
