Foto: Fondo María

Especial: Derecho a decidir 

Tak walkila’, ts’o’ok lajka’ap’éel ja’ab káajak u meyaj Fondo María ti’al u ts’áak ba’ax ku k’a’abéetchajal ti’ ko’olel yaan tu lu’umil México ti’al u xot’ik u yo’omilo’ob, ba’ale’ ti’al u beeta’al je’el bix jeets’el unaj ti’al u kaláanta’al u toj óolal, tu noj kaajil Ciudad de México.  

Múuch’kabile’ síij tu ja’abil 2009, ikil u kaxta’al u chan xo’ot’ol x ma’ keetil kuxtal yaan yéetel ko’olel kaja’an te’e noj kaajo’, tumen chéen leti’ob yaan ka’ach u páajtalil u k’áatiko’ob ka éensa’ak paal, wa abortóo, tumen le uláak’o’ob yaan ti’ u jeel péetlu’umilo’obo’ mina’an ti’ob le páajtalil je’elo’.

Ti’al túun u kaláanta’al u páajtal u yéensik paal ko’olel, je’el bix jets’a’an unaj u beeta’alo’, Fondo Maríae’ ku ts’áak áantaj ti’ ba’alo’ob je’el bix: u yáantaj ti’al u k’uchul ko’olel tu’ux unaj, u ts’áak ti’ tu’ux u wenel, u bo’otik estuudios unaj u beeta’al ti’, úultrasonidoos yéetel u ma’anal ts’aak k’a’abée tti’, je’el bix xan u ts’a’abal u yojéelt tuláakal ba’ax k’a’abéet ti’al u yéensiko’ob paal ich jáalk’abil.

“Ba’ax k chíimpoltik to’one’, leti’ u páajtalil u jets’ik máak ba’ax u k’áat u beetej. Ma’ táan k a’alik ba’ax le kun beetbilo’, to’one’ chéen k áantaj ti’al u páajtal u beetik ko’olel le ba’ax kéen u jets’o’. U ts’ook t’aanile’, ti’ ko’olel yaan, to’one’ chéen k péek yéetel u taak’inil, beyxan ti’al k áantaj”, beey u tsolik Sofía Garduño, máax jo’olbesik u beeta’al meyaj te’e Fondo Maríao’. 

Áantaj ku ts’a’abale’ ma’ chéen taak’ini’. Tumen ku láak’inajo’ob, ma’ili’ éensa’ak paal, kéen beeta’ak yéetel kéen ts’o’okok u beeta’al. Máaxo’ob táakano’ob áantaj ichil u múuch’kabil Fondo María ka’ansa’ano’ob ti’al u chíimpoltiko’ob ba’ax ku yu’ubiko’ob yéetel ti’al u yáantajo’ob, ts’o’okole’ nuup’ulo’ob meyaj yéetel uláak’ mola’ayo’ob tu’ux je’el u páajtal u túuxta’al ko’olel kéen k’a’abéetchajak.

Fondo Maríae’ ku jets’ik u k’iinil u bin ko’olel ti’ le kúuchilo’ob jets’a’an ti’al u yéensa’al paal ti’ u mola’ayil Secretaría de Salud wa ti’ pribaadóo mola’ayil ts’akyaj. Tuláakal meyaj ku beeta’al yéetel ko’olel ku yéensik paale’, ku kaláanta’al tak tu jo’oloj jump’éel winal kéen ts’o’okok u beeta’al, ti’al u yila’al wa k’a’anan u ts’a’abal uláak’ áantaj ti’ ko’olel; beyxan ku yila’al bix u meyaj tuláakal le mola’ayo’obo’ kéen u yéenso’ob paal. 

Ikil táan u máan 28 ti’ septiembre, U K’iinil u Beeta’al Meyajo’ob ti’al u Páajtal U Yéensa’al Paal ich Kananil yéetel Bix Unaje’, Fondo Maríae’ tu k’a’aytaje’ ts’o’ok u yáantik 12 mil 200 u túul ko’olel ti’al u xot’ik u yo’omil.

Je’el máaxak ko’olel ti’ u noj lu’umil México u k’áat ka láak’inta’ak x ma’ bo’olil tumen Fondo María, wa tumen ku jets’ik yaan u yéensik u paalile’, ku páajtal u t’aan 55 5038 1700, extensión 7378, wa u túuxtik ts’íib ti’ u reedeso sosiialesil le múuch’kabilo’.

 

También te puede interesar: 

-Hay abortos seguros, pese a obstáculos antiderechos

-QRoo, a la cabeza de mujeres que acuden a la CDMX a interrumpir su embarazo

-Interrumpir el embarazo, nuestra elección y derecho como mujeres: testimonios

-En cuatro municipios de QRoo anuncian marchas feministas a favor del aborto

-Fondo María, 12 años acompañando en abortos seguros

-Esta Legislatura abordará la despenalización del aborto de forma seria: Vida Gómez

-''Debe eliminarse estigma a mujeres que deciden sobre su cuerpo'': activista

-Red de mujeres apoya con medicamentos para abortar en la península de Yucatán

-Reconoce Inmujeres a grupos 'marea verde' por aborto legal

-Congreso yucateco con despenalización del aborto en la mira

-Día de Acción Global por el acceso al Aborto: Una cuestión de derechos humanos

-Léejislatura táan u meyaj walkila’ yaan u ch’a’ajoltik tu beel ti’al ka luk’sa’ak u si’ipil kéen éensa’ak paal: Vida Gómez

 

Xak'alutskíinsa'an tumen: Sasil Sánchez Chan